અમદાવાદ :અદાણી સ્પોર્ટ્સલાઈને તેના પ્રખ્યાત એથ્લીટ પ્રોગ્રામ ‘ગર્વ હૈ’ માટે ઓફિશિયલ જર્સીનું ભવ્ય અનાવરણ કર્યું છે. એવોર્ડ વિજેતા ડિઝાઇનર આકિબ વાની દ્વારા તૈયાર કરાયેલ આ જર્સી ‘ગર્વ હૈ’ પહેલ હેઠળ જોડાયેલા તમામ ખેલાડીઓ માટે એક સંયુક્ત ઓળખરૂપ કીટ તરીકે કામ કરશે.
આ જર્સીનું લોન્ચિંગ ‘ગર્વ હૈ’ કાર્યક્રમ માટે મહત્વપૂર્ણ સીમાચિહ્ન માનવામાં આવી રહ્યું છે. આ પહેલ દ્વારા અદાણી સ્પોર્ટ્સલાઈન ઉભરતા ભારતીય એથ્લેટ્સને એક મજબૂત અને એકીકૃત ઓળખ આપવા તરફ આગળ વધી રહ્યું છે.
આકિબ વાનીએ અગાઉ ભારતીય રાષ્ટ્રીય ક્રિકેટ ટીમ તેમજ સમર ઓલિમ્પિક 2024 અને એશિયન ગેમ્સ 2022 માટે ઓફિશિયલ સ્પોર્ટ્સ કિટ્સ ડિઝાઇન કરી છે. ‘ગર્વ હૈ’ જર્સી ભારતના યુવાનોની ભાવનાને પ્રતિબિંબિત કરે છે, જેમાં ગૌરવ, મહત્વાકાંક્ષા અને શ્રેષ્ઠતા જેવા મૂલ્યોને ખાસ મહત્વ આપવામાં આવ્યું છે.
આ પ્રોગ્રામનો મુખ્ય હેતુ ભારતના આગામી પેઢીના ખેલાડીઓને પાયાથી લઈને આંતરરાષ્ટ્રીય સ્તર સુધી સતત ટેકો આપવાનો છે, જેથી તેઓ વૈશ્વિક મંચ પર દેશનું પ્રતિનિધિત્વ કરી શકે.
આ પ્રસંગે અદાણી સ્પોર્ટ્સલાઈનના ચીફ બિઝનેસ ઓફિસર સંજય આદેશરાએ જણાવ્યું હતું કે, “આ જર્સી માત્ર એક કીટ નથી, પરંતુ વિશ્વાસ, આશા અને એકતાનું પ્રતીક છે. આકિબ વાનીએ તેમની ડિઝાઇન દ્વારા આ ભાવનાને અનોખી રીતે રજૂ કરી છે.”
ડિઝાઇનર આકિબ વાનીએ જણાવ્યું હતું કે, “એક જ ઓળખ હેઠળ અનેક પ્રતિભાશાળી એથ્લેટ્સને જોડતી આ જર્સી ડિઝાઇન કરવી ગૌરવની વાત છે. આ ડિઝાઇન શક્તિ, ગૌરવ અને ઊંચા લક્ષ્યોને પ્રતિબિંબિત કરે છે.”
અદાણી સ્પોર્ટ્સલાઈન અને આકિબ વાની વચ્ચેનો સહયોગ પણ વધુ મજબૂત બન્યો છે. અગાઉ વાનીએ અદાણી અમદાવાદ મેરેથોનની 9મી આવૃત્તિ માટે ઓફિશિયલ જર્સી ડિઝાઇન કરી હતી, જેમાં 24,000થી વધુ દોડવીરોએ ભાગ લીધો હતો.
‘ગર્વ હૈ’ અદાણી ગ્રૂપની રાષ્ટ્રીય પહેલ છે, જેનો હેતુ ભારતના આગામી સ્પોર્ટ્સ ચેમ્પિયન્સને વિકસાવવાનો અને તેમને રાષ્ટ્રીય તેમજ આંતરરાષ્ટ્રીય સ્તરે આગળ વધારવાનો છે.
‘ગર્વ હૈ’ સાથે જોડાયેલા એથ્લેટ્સ:
* આર. પ્રજ્ઞાનન્ધા
* પોયમંતિ બૈસ્ય
* મનીષા ગઢિયા
* અભિમન્યુ સિંહ ભાટી
* અશોક કુમાર
* નૂરજહાં નૂરઅલી જમાની
* લક્ષ્મી જડાલા
* નૂપુર શિયોરન
