Fact Check: 8 માર્ચ 2026ના રોજ ટીમ ઇન્ડિયાએ અમદાવાદના નરેન્દ્ર મોદી સ્ટેડિયમમાં ન્યૂઝીલેન્ડને હરાવી સતત બીજી વખત ICC પુરુષ ટી20 વર્લ્ડ કપનો ખિતાબ જીત્યો હતો. તેની સાથે ભારત આ ટ્રોફી ત્રણ વખત જીતનાર પ્રથમ દેશ બન્યો. ટીમની આ મોટી જીત બાદ સમગ્ર દેશમાં ખુશીની લહેર ફરી વળી અને સોશિયલ મીડિયામાં ખેલાડીઓને શુભેચ્છાઓની વરસાત થઈ. ટીમના ટેસ્ટ અને વન-ડે કપ્તાન શુભમન ગિલે પણ ટીમને અભિનંદન આપતા એક પોસ્ટ શેર કરી. જોકે, તેમની પોસ્ટ સામે આવ્યા બાદ સોશિયલ મીડિયામાં વિવાદ ઊભો થયો.
ફોટોમાં સંજુ સેમસન ન દેખાતા વિવાદ
શુભમન ગિલે ટ્રોફી સાથે ટીમ ઇન્ડિયાની એક તસવીર શેર કરી હતી. પરંતુ તે ફોટોમાં સ્ટાર વિકેટકીપર બેટ્સમેન સંજુ સેમસન ગાયબ હતો, જ્યારે અન્ય ખેલાડીઓ ટ્રોફી સાથે ઉજવણી કરતા જોવા મળ્યા હતા. આ વાત સામે આવતા સોશિયલ મીડિયા પર યુઝર્સે ગિલને ટ્રોલ કરવાનું શરૂ કર્યું.
શું ગિલે જાણી જોઈને સેમસનને ફોટોમાંથી હટાવ્યો?
સોશિયલ મીડિયામાં કેટલાક યુઝર્સે દાવો કર્યો કે શુભમન ગિલે જાણબૂઝીને ઉજવણીની તસવીરમાંથી સંજુ સેમસનને કાઢી નાખ્યો છે. કારણ રૂપે એવું પણ કહેવામાં આવ્યું કે ટી20 વર્લ્ડ કપ 2026 પહેલા ગિલ ટીમમાંથી બહાર થઈ ગયો હતો અને તેમની જગ્યાએ સંજુ સેમસનને ટીમમાં સામેલ કરવામાં આવ્યો હતો.
ટૂર્નામેન્ટ દરમિયાન સંજુ સેમસને મહત્વપૂર્ણ પ્રદર્શન કર્યું હતું. તેમણે નોકઆઉટ તબક્કામાં ત્રણ મહત્વપૂર્ણ ઇનિંગ્સ રમી હતી—સુપર 8માં વેસ્ટ ઇન્ડિઝ સામે 97 રન, સેમિફાઈનલમાં ઇંગ્લેન્ડ સામે 89 રન અને ફાઈનલમાં ન્યૂઝીલેન્ડ સામે 89 રન બનાવી ભારતને જીત અપાવવામાં મહત્વનો ફાળો આપ્યો હતો.
ફેન્સ દ્વારા સોશિયલ મીડિયામાં ગિલ પર આક્ષેપો કરવામાં આવ્યા કે તેમણે ફોટોને ક્રોપ કરીને સંજુ સેમસનને દૂર કર્યા છે. જોકે, ફેક્ટ ચેકમાં જાણવા મળ્યું કે આ દાવો ખોટો અને ભ્રામક છે. ગિલ દ્વારા શેર કરાયેલી તસવીર ક્રોપ કરેલી નહોતી, પરંતુ ટીમના વિજય સમારંભ દરમિયાન લેવામાં આવેલી મૂળ તસવીર જ હતી, જેમાં સંજુ સેમસન તે ફ્રેમમાં હાજર નહોતો. આ રીતે સોશિયલ મીડિયામાં ફરતો દાવો ભ્રામક સાબિત થયો છે.
