રોયલ ચેલેન્જર્સ બેંગલુરુએ મહિલા પ્રિમીયર લીગ 2026નો ખિતાબ જીતી લીધો છે. ફાઈનલમાં તેણે દિલ્હીને છ વિકેટથી હરાવ્યું, પહેલા બેટિંગ કરતા દિલ્હીએ 20 ઓવરમાં ચાર વિકેટ પર 203 રનનો વિશાળ સ્કોર ઊભો કર્યો, પરંતુ આરસીબીએ 19.4 ઓવરમાં ચાર વિકેટના નુકસાને રેકોર્ડ ટાર્ગેટ ચેજ કરી જીત મેળવી લીધી.
આ હાર દિલ્હી માટે દિલ તોડનારી રહી, કારણ કે ટીમને સતત ચોથી સીઝનમાં ફાઇનલમાં હારનો સામનો કરવો પડ્યો. આ હાર બાદ દિલ્હીની કેપ્ટન જેમિમા રોડ્રિગ્સ રડી પડી હતી. ત્યારબાદ આરસીબીની કેપ્ટન અને જેમિમાની ખાસ મિત્ર સ્મૃતિ મંધાના તેની પાસે આવી, તેને ગળે લગાવી હિંમત આપી અને હસાવવાનો પ્રયત્ન કર્યો. આ ક્યૂટ ક્ષણ કેમેરામાં કેદ થઈ ગઈ.
હકીકતમાં, છેલ્લી ચારેય સીઝનમાં જેમિમા દિલ્હી ટીમનો ભાગ રહી છે. પહેલી ત્રણ સીઝનમાં તે ખેલાડી તરીકે રમી હતી, કારણ કે તે સમયે મેગ લેનીંગ કેપ્ટન હતી. પરંતુ આ સીઝનમાં મેગ લેનીંગ યુપી જવાથી જેમિમાને ટીમની કેપ્ટન બનાવવામાં આવી. તેમ છતાં દિલ્હીનું નસીબ બદલાઈ શક્યું નહીં. સ્કોરબોર્ડ પર વિશાળ સ્કોર ઉભો કર્યા બાદ પણ ટીમને હાર ભોગવવી પડી.
ફાઈલનમાં હાર બાદ જેમિમા ખૂબ ભાવુક દેખાઈ. તે વારંવાર આંખોમાંથી આંસુ લૂંછતા જોવા મળી. ત્યારબાદ સ્મૃતિ મંધાના તેની પાસે પહોંચી. મંધાનાએ પોતાની ઓરેન્જ કેપ જેમિમાને પહેરાવી, પછી તેમના ગાલ પકડીને હસવા કહ્યું અને બાદમાં તેમને ગળે લગાવી. એટલું જ જેમિમા માટે પૂરતું હતું. ગળે મળતી વખતે મંધાના પણ ભાવુક દેખાઈ, કારણ કે આ જીત તેમના માટે પણ સરળ નહોતી.
પાછલા કેટલાક સમયથી સ્મૃતિ મંધાનાએ પણ ઘણી મુશ્કેલીઓનો સામનો કર્યો છે. લગ્નના દિવસે જ લગ્ન તૂટી જવા તેમાં મુખ્ય હતું. તેમ છતાં મંધાનાની હિંમત તૂટી નહોતી અને તેણે પોતાની ટીમને બીજી વખત ખિતાબ જીતાવ્યો. તે મુશ્કેલ સમયમાં જેમિમા મંધાનાની સાથે હતી. તેણે મહિલા બિગ બેશ લીગ છોડી મંધાનાની સાથે સમય વિતાવ્યો અને પોતાની મિત્રની દરેક ક્ષણે સાથે રહી હતી.
એ જ કારણથી ફાઇનલમાં હાર બાદ પોતાની મિત્રને ભાવુક જોઈ મંધાનાથી રહી ન શકાયું અને તે જેમિમાને ગળે લગાવવા પહોંચી. ત્યારબાદ ત્યાં શ્રેયંકા પાટિલ, અરુંધતિ રેડ્ડી અને રાધા યાદવ પણ આવી પહોંચી. તેઓ પણ જેમિમાની નજીકની મિત્રો છે. શ્રેયંકાએ પણ જેમિમાના ગાલ પકડી તેમને હસાવવાનો પ્રયાસ કર્યો, ત્યારબાદ જેમિમા ફરી હસતી જોવા મળી.
પહેલાં બેટિંગ કરનાર દિલ્હી ટીમ માટે લિઝેલ લીએ 30 બોલમાં 37 રન બનાવ્યા અને શેફાલી વર્માએ 13 બોલમાં 20 રનની ઇનિંગ રમી. વોલ્વાર્ડ્ટે 25 બોલમાં ત્રણ ચોગ્ગા અને બે છક્કાની મદદથી 44 રન બનાવ્યા. તેના સિવાય કેપ્ટન જેમિમા રોડ્રિગ્સે 37 બોલમાં આઠ ચોગ્ગાની મદદથી 57 રનની શાનદાર ઇનિંગ રમી. ચિનેલ હેનરીએ 15 બોલમાં ચાર ચોગ્ગા અને બે છગ્ગાની મદદથી 35 રનની નોટઆઉટ તોફાની ઇનિંગ રમી. દિલ્હી ટીમે 20 ઓવરમાં ચાર વિકેટ ગુમાવી 203 રન બનાવ્યા. આરસીબી તરફથી લોરેન બેલે ચાર ઓવરમાં માત્ર 19 રન આપ્યા, જોકે તેમને કોઈ વિકેટ મળી નહોતી. સાયલી સતઘરે, અરુંધતિ રેડ્ડી અને નદીન ડી ક્લાર્કને એક-એક વિકેટ મળી.
જવાબમાં આરસીબીને નવ રન પર પહેલો ઝટકો લાગ્યો હતો. શાનદાર ફોર્મમાં રહેલી ગ્રેસ હેરિસ નવ રન બનાવી આઉટ થઈ હતી. ત્યારબાદ કેપ્ટન મંધાના અને જ્યોર્જિયા વોલે 92 બોલમાં 165 રનની વિજયી ભાગીદારી કરી. વોલે 54 બોલમાં 14 ચોગ્ગાની મદદથી 79 રનની ઇનિંગ રમી. રિચા ઘોષ છ રન બનાવી આઉટ થઈ. નદીન સાત રન અને રાધા 12 રન બનાવી નોટઆઉટ રહી. આરસીબીએ 19.4 ઓવરમાં લક્ષ્ય હાંસલ કર્યું. દિલ્હી તરફથી ચિનેલે બે વિકેટ લીધી, જ્યારે નંદિની અને મિન્નૂને એક-એક વિકેટ મળી.
