જાહેર ક્ષેત્રની ટેલિકોમ કંપની BSNLએ ભારતની પ્રથમ ઇન્ટરનેટ ટેલિફોની સર્વિસ રજૂ કરી છે, જેના કારણે ગ્રાહકો કંપનીની મોબાઇલ એપ્લીકેશન ‘વિંગ્સ’નો ઉપયોગ કરીને ભારતમાં કોઈ પણ ટેલિફોન નંબર ડાયલ કરી શકશે. આની પહેલાં, મોબાઇલ એપ્સ પરથી ચોક્કસ એપ્લીકેશનના ગ્રાહકોને જ ફોન કોલ થઈ શકતો હતો અને ટેલિફોન નંબર પર કોલ થઈ શકતો નહોતો. આ સર્વિસનું ઉદ્ઘાટન કર્યા બાદ ટેલિકોમ મંત્રી મનોજ સિંહાએ જણાવ્યું હતું કે, “ઈન્ટરનેટ ટેલિફોનીના કારણે ગ્રાહકો SIM વગર કોલ કરી શકશે અને આ સર્વિસ શરૂ કરવા બદલ હું BSNLના મેનેજમેન્ટને અભિનંદન પાઠવું છું.”
આ સર્વિસનો ઉપયોગ કરીને BSNLના ગ્રાહકો BSNLની અથવા અન્ય કંપનીની વાઇ-ફાઇ સર્વિસનો ઉપયોગ કરીને પણ દેશમાં કોઈપણ નેટવર્ક પર કોલ કરી શકશે. ડિપાર્ટમેન્ટ ઓફ ટેલિકોમની સર્વોચ્ચ નિર્ણાયક સંસ્થા ટેલિકોમ કમિશને યોગ્ય ટેલિકોમ લાયસન્સ ધરાવતી કંપનીઓને વાઇ-ફાઇ કનેક્શનનો ઉપયોગ કરીને પણ એપ્લીકેશન આધારિત કોલિંગ સર્વિસ માટે છૂટ આપેલી છે.
