ઇલેક્ટ્રિક વાહન લેવાનું વિચારી રહ્યાં છો? તો આટલી વસ્તુ ખાસ ધ્યાન રાખજો, નહીંતર પૈસા પાણીમાં પડી જશે

અમદાવાદ: આજકાલ દેશમાં ઇલેક્ટ્રિક વાહનો (EV)ની માગમાં ઝડપથી વધારો થઈ રહ્યો છે. પેટ્રોલ અને ડીઝલના ભાવ સતત વધી રહ્યા છે, જેના કારણે લોકો ઈલેક્ટ્રિક વાહનો તરફ વળી રહ્યાં છે. આ વાહનો ચલાવવામાં સસ્તા છે અને પર્યાવરણને પણ ઓછું નુકસાન પહોંચાડે છે. પરંતુ ઇલેક્ટ્રિક વાહન ખરીદતા પહેલાં કેટલીક મહત્વની બાબતો ધ્યાનમાં રાખવી જરૂરી છે, ચાલો, આ વિશે વિગતવાર જાણીએ.

તમારી જરૂરિયાત અનુસાર વાહન ખરીદો

ઇલેક્ટ્રિક વાહન ખરીદતા પહેલાં તમારે તમારી રોજિંદી જરૂરિયાતો સમજવી જરૂરી છે. જો તમે દરરોજ લાંબી મુસાફરી કરો છો, તો એવું વાહન પસંદ કરો જે સિંગલ ચાર્જમાં વધુ રેન્જ આપે એટલે કે વધારે કિલોમીટર સુધી ચાલે. પરંતુ જો તમે શહેરમાં ટૂંકા અંતર માટે વાહનનો ઉપયોગ કરો છો, તો ઓછી રેન્જવાળું વાહન પણ તમારા માટે બેસ્ટ છે.

ચાર્જિંગની સુવિધા તપાસી લેવી

EV ખરીદતા પહેલાં તમારા વિસ્તારમાં ચાર્જિંગ સ્ટેશનની ઉપલબ્ધતા ચોક્કસ તપાસો. જો તમારી નજીક ફાસ્ટ ચાર્જિંગ સ્ટેશન નથી, તો ઘરે ચાર્જિંગ સેટઅપ કરવાની સુવિધા હોવી જોઈએ. ચાર્જિંગની વ્યવસ્થા વિના EV ખરીદવું પાછળથી મુશ્કેલી ઊભી કરી શકે છે.

બેટરીની ક્વોલિટી અને વોરંટી ચેક કરી લો

ઇલેક્ટ્રિક વાહનમાં સૌથી મોંઘી વસ્તુ તેની બેટરી હોય છે. તેથી એવું વાહન પસંદ કરો જેમાં બેટરીની ક્વોલિટી સારી હોય અને લાંબી વોરંટી મળતી હોય. સામાન્ય રીતે, કંપનીઓ 6થી 8 વર્ષ અથવા ચોક્કસ કિલોમીટર સુધીની બેટરી વોરંટી આપે છે. આ બાબતને ધ્યાનથી તપાસો.

મેન્ટેનન્સ અને સર્વિસ નેટવર્ક

ઈલેક્ટ્રિક વાહન (EV)નું મેન્ટેનન્સ અને સર્વિસ સામાન્ય વાહનોથી અલગ હોય છે. તેથી એવી કંપની પસંદ કરો જેનું સર્વિસ નેટવર્ક મજબૂત હોય અને તમારા શહેરમાં સર્વિસ સેન્ટર ઉપલબ્ધ હોય. જો સર્વિસ સેન્ટર નજીક ન હોય, તો મુશ્કેલીના સમયે મદદ મેળવવી મુશ્કેલ બની શકે છે.

સરકારી સબસિડીનો લાભ લો

સરકાર ઇલેક્ટ્રિક વાહનોને પ્રોત્સાહન આપવા માટે સબસિડી અને ટેક્સમાં રાહત આપે છે. ઘણા રાજ્યોમાં EV ખરીદવા પર રોકડ ઇન્સેન્ટિવ પણ મળે છે. ખરીદી પહેલાં તમારા રાજ્યની EV પોલિસી તપાસો, જેથી તમને વાહન સસ્તામાં મળી શકે.

ટેસ્ટ ડ્રાઇવ જરૂર કરો

ઇલેક્ટ્રિક વાહન ખરીદતા પહેલાં હંમેશાં ટેસ્ટ ડ્રાઇવ લો. આનાથી તમને વાહનની પરફોર્મન્સ, આરામ અને હેન્ડલિંગનો ખ્યાલ આવશે. ટેસ્ટ ડ્રાઇવ વિના નિર્ણય લેવો યોગ્ય નથી. EV ખરીદવું એ લાંબા ગાળાનું રોકાણ છે. તેથી ઉતાવળ ન કરો. વિવિધ મોડેલોની સરખામણી કરો, ફીચર્સ ચેક કરો અને તમારા બજેટ અને જરૂરિયાત મુજબ શ્રેષ્ઠ વિકલ્પ પસંદ કરો.