Baba Vanga Predictions 2026: દુનિયાભરમાં બાબા વેંગા તેમની ભયજનક ભવિષ્યવાણીઓ માટે જાણીતા છે. તેમની અનેક આગાહીઓ સમયાંતરે વાયરલ થતી રહે છે. બાબા વેંગાએ વર્ષ 2026ને યુદ્ધ અને વિનાશનું વર્ષ ગણાવ્યું હતું. હાલમાં યુનાઇડેટ સ્ટેટ અને ઇરાન વચ્ચે તણાવ ચરમસીમાએ છે. બંને દેશો વચ્ચે ક્યારે પણ યુદ્ધ ભભૂકી શકે છે, જ્યારે પહેલેથી જ રશિયા અને યુક્રેન વચ્ચે યુદ્ધ ચાલી રહ્યું છે. જો અમેરિકા અને ઇરાન વચ્ચે યુદ્ધ શરૂ થાય, તો તે અત્યંત ખતરનાક સ્વરૂપ ધારણ કરી શકે છે.
બાબા વેંગાએ 2026માં ત્રીજા વિશ્વ યુદ્ધની શરૂઆત થવાની આગાહી કરી હતી. તેમણે કહ્યું હતું કે દુનિયાના પૂર્વીય વિસ્તારમાં એક મોટું અને વિનાશકારી યુદ્ધ શરૂ થઈ શકે છે, જે ધીમે-ધીમે સમગ્ર વિશ્વમાં ફેલાઈ જશે. આ આગાહીએ લોકોમાં ભય ફેલાવ્યો છે.
બાબા વેંગાની આગાહી મુજબ, આ યુદ્ધથી વિશ્વનો પશ્ચિમ ભાગ સૌથી વધુ પ્રભાવિત થશે. તેમના કહેવા મુજબ, આ સંઘર્ષ વૈશ્વિક શક્તિ સંતુલનમાં મોટો ઉથલપાથલ લાવી શકે છે અને ભારે પ્રમાણમાં વિનાશ તથા જાનહાનિ થઈ શકે છે. ખાસ કરીને રશિયા-અમેરિકા તણાવ, અમેરિકા તરફથી ઇરાનને ધમકીઓ અને ચાઇના-તાઇવાન વિવાદને ધ્યાનમાં રાખીને લોકોમાં ચિંતા વધી રહી છે.
આગાહી અંગે દાવો કરવામાં આવી રહ્યો છે કે આ યુદ્ધ માર્ચ-એપ્રિલ 2026 દરમિયાન શરૂ થઈ શકે છે. આ સંઘર્ષમાં રશિયા અને અમેરિકા જેવા શક્તિશાળી દેશો સીધા આમને-સામને આવી શકે છે. કહેવામાં આવે છે કે આ યુદ્ધનો સૌથી મોટો ફટકો યુરોપને લાગી શકે છે, જે વિનાશ બાદ વેરાન ભૂમિમાં ફેરવાઈ શકે છે, જ્યારે રશિયા એક મોટી વૈશ્વિક શક્તિ તરીકે ઊભરી શકે છે.
દુનિયા પહેલેથી જ અનેક સંઘર્ષો અને રાજકીય અથડામણોમાં ઘેરાયેલી છે, તેથી બાબા વેંગાની આ આગાહીઓને વર્તમાન પરિસ્થિતિ સાથે જોડીને જોવામાં આવી રહી છે.
ઉલ્લેખનીય છે કે બાબા વેંગાએ સોવિયત યુનિયનના વિઘટન અને અમેરિકામાં આતંકી સંગઠન અલ-કાયદા દ્વારા 9/11 હુમલા જેવી કેટલીક આગાહીઓ કરી હતી, જે બાદમાં સાચી સાબિત થઈ હોવાનું કહેવાય છે.
