અમદાવાદ: ગ્લોબલ વોર્મિંગની અસર વિશ્વના હવામાન પર જોવા મળી રહી છે. ઋતુઓની પેટર્ન બદલાતી જોવા મળી રહી છે. ચાલુ વર્ષે ગુજરાતમાં શિયાળાની ઋતુમાં મોટા ભાગના દિવસોમાં તાપમાન સામાન્ય કરતા ઊંચું જોવા મળ્યું. ગુજરાતમાં કોલ્ડવેવની આગાહી તો આવી જ નહીં. જોઈએ તેવી ઠંડી ન પડવાના કારણે શિયાળુ પાક પર અસર પડી છે. સાથે એક પછી એક વેસ્ટર્ન ડિસ્ટર્બન્સના કારણે તાપમાનમાં સતત વધઘટ જોવા મળી છે. તો બીજી બાજુ 11 વર્ષ બાદ ચાલુ વર્ષે સૂર્ય કલંક એટલે કે સૂર્યમાં ડાઘ જોવા મળી રહ્યા છે.
હવામાન નિષ્ણાત અંબાલાલ પટેલે જણાવ્યું કે, સૂર્યમાં ડાઘા જોવા મળ્યા છે. જે 2000 અને 2006ના વર્ષમાં પણ જોવા મળ્યા હતા. સૂર્યમાં ડાઘાની અસર ગજબની થાય છે. ખાસ કરીને પેસેફિક મહાસાગર પર થાય છે. અને વાવાઝોડા બનતા હોય છે. આની અસર પેરુ નજીકમાં જળવાયુ ગરમ થાય અને અલનીનો બને છે. આ અલનીનો બનવાની શક્યતા રહે છે. સૂર્યમાં 11 વર્ષે કલંક જણાય છે. વૈશ્વિક મોસમ પર જબરદસ્ત અસર પડતી હોય છે. વિશ્વના હવામાનમાં ફેરફાર થશે. ગરમીના કારણે માધાંતાના મન પર અસર પડે છે.
અન્ય બીજા કારણો જોઈએ તો પણ પાછોતરો વરસાદ સારો જવાની શક્યતા રહેશે. અલનીનોની અસરના કારણે કોઈ કોઈ ભાગોમાં ખંડ વૃષ્ટિ થવાની શક્યતા રહેશે. આ સૂર્ય કલંકો છે તે ક્યારેક બંગાળના ઉપસાગર અને અરબી સમુદ્ર પર અસર કરે તો તેની ગરમીના કારણે અરબી સમુદ્રમાં પણ વાવાઝોડું બનવાની શક્યતા રહેશે અને બંગાળના ઉપસાગર પર પણ વાવાઝોડું બનવાની શક્યતા રહેશે જેના કારણે દક્ષિણ ભારતના વિસ્તારો પ્રભાવિત થશે. એક પછી એક લો પ્રેશર બનશે અને લો પ્રેશરના કારણે ગુજરાતનું ચોમાસું સારું રહી શકે છે.
