નવી દિલ્હી : દિલ્હીના રોહિણી વિસ્તારમાં CRPF સ્કૂલની બહાર થયેલા બ્લાસ્ટ બાદ મુખ્યમંત્રી આતિશીએ કાયદો અને વ્યવસ્થાને લઈને ભાજપ પર નિશાન સાધ્યું હતું. તેમણે કહ્યું કે દિલ્હીમાં કાયદો અને વ્યવસ્થાની સંપૂર્ણ જવાબદારી કેન્દ્ર સરકારની છે, પરંતુ ભાજપ પોતાનું કામ છોડીને ચૂંટાયેલી દિલ્હી સરકારના કામને રોકવાનો પ્રયાસ કરે છે. તેમણે આ ઘટનાને કેન્દ્ર સરકારની નિષ્ફળતા ગણાવી અને કહ્યું કે આજે દિલ્હીની સ્થિતિ 1990ના દાયકાના મુંબઈ અંડરવર્લ્ડ જેવી થઈ ગઈ છે. આતિશીએ કહ્યું કે દિલ્હીમાં દરરોજ ગુંડાઓ દ્વારા ખંડણીની ઘટનાઓ સાંભળવા મળી રહી છે અને ગુનેગારોનું મનોબળ વધ્યું છે. શાળાની બહાર થયેલા વિસ્ફોટને દિલ્હીમાં કાયદો અને વ્યવસ્થાની સ્થિતિનું પ્રતિક ગણાવતા તેમણે કહ્યું કે આ ભાજપની નિષ્ફળતાનું પરિણામ છે.
કેન્દ્ર સરકાર પર પ્રહાર કરતા તેમણે કહ્યું કે ભાજપ પોતાનો 99% સમય ચૂંટાયેલી દિલ્હી સરકારના કામને રોકવામાં વિતાવે છે, જ્યારે કાયદો અને વ્યવસ્થાની જવાબદારી સંપૂર્ણપણે તેમની છે. આતિશીએ મોદી સરકારની આકરી ટીકા કરતા કહ્યું કે ભાજપ પાસે ન તો કામ કરવાની ઈચ્છા છે કે ન ક્ષમતા. જો ભૂલથી પણ દિલ્હીની જનતા દિલ્હીની જવાબદારી ભાજપને આપી દે તો તેઓ શાળા, હોસ્પિટલ, વીજળી અને પાણીની જેમ કાયદો અને વ્યવસ્થાની કરી છે તે જ કરશે. તેમણે ભાજપને અપીલ કરી કે તેઓ પોતાની જવાબદારીઓ પર ધ્યાન આપે અને ચૂંટાયેલી દિલ્હી સરકારના કામમાં દખલ કરવાનું બંધ કરે. આ વિસ્ફોટ રોહિણીમાં CRPF સ્કૂલથી લગભગ 200 થી 250 મીટરના અંતરે થયો હતો, જોકે તેમાં કોઈ જાનહાનિ થઈ ન હતી. ઘટનાની જાણ થતાં જ 89મી પોલીસ બટાલિયન અને ફાયર બ્રિગેડની ટીમ ઘટનાસ્થળે પહોંચી ગઈ હતી. તહેવારોની સિઝનમાં આ બ્લાસ્ટને લઈને સુરક્ષા એજન્સીઓએ ચિંતા વ્યક્ત કરી છે. ફોરેન્સિક સાયન્સ લેબોરેટરીની ટીમે પ્રાથમિક તપાસમાં તેને ક્રૂડ બોમ્બ ગણાવ્યો છે, પરંતુ રિપોર્ટ આવ્યા બાદ જ સંપૂર્ણ માહિતી સ્પષ્ટ થશે.
દિલ્હીના રોહિણી વિસ્તારમાં CRPF સ્કૂલની બહાર થયેલા બ્લાસ્ટ બાદ મુખ્યમંત્રી આતિશીએ એક્સ પોસ્ટ પર લખ્યું છે અને કેન્દ્ર સરકાર પર પણ આરોપ લગાવ્યો છે, પોસ્ટમાં આતિશીએ લખ્યું છે કે રોહિણીમાં એક શાળાની બહાર બોમ્બ વિસ્ફોટની ઘટના દિલ્હીની કફોડી સુરક્ષા વ્યવસ્થાને ઉજાગર કરી રહી છે. દિલ્હીમાં કાયદો અને વ્યવસ્થાની જવાબદારી ભાજપની કેન્દ્ર સરકારની છે. પરંતુ ભાજપ આ કામ છોડીને પોતાનો બધો સમય દિલ્હીની ચૂંટાયેલી સરકારના કામને રોકવામાં ખર્ચી નાખે છે. આ જ કારણ છે કે આજે દિલ્હીની સ્થિતિ 1990ના દાયકામાં મુંબઈના અંડરવર્લ્ડના જમાના જેવી થઈ ગઈ છે. શહેરમાં ખુલ્લેઆમ ગોળીબાર થઈ રહ્યો છે, ગુંડાઓ પૈસા પડાવી રહ્યા છે અને ગુનેગારોનું મનોબળ ઉંચુ છે. ભાજપ પાસે કામ કરવાની ન તો ઈરાદો છે કે ન ક્ષમતા. ભૂલથી પણ જો દિલ્હીની જનતા તેમને દિલ્હી સરકારની જવાબદારી સોંપશે તો તેઓ શાળા, હોસ્પિટલ, વીજળી અને પાણીની હાલત એવી જ કરી દેશે જે આજે દિલ્હીની કાયદો અને વ્યવસ્થાની સ્થિતિ છે.
