અમદાવાદ: સેવા અને સ્વાવલંબનની પ્રેરણાથી આહાર મેનેજમેન્ટ એસોસિએશન દ્વારા #સેવા_સંકલ્પ_અભિયાન અંતર્ગત ‘આહાર ગુજરાત ફૂડ એન્ટરપ્રેન્યોર મહા સેમિનાર’નું આયોજન અમદાવાદના રાજપથ ક્લબ ખાતે આવેલા પંડિત દીનદયાલ ઉપાધ્યાય હોલમાં કરવામાં આવ્યું હતું. આહાર ગુજરાતના ચેરમેન નરેન્દ્રસિંહ પુરોહિતની આગેવાનીમાં યોજાયેલા કાર્યક્રમમાં ગુજરાતના ફૂડ ઉદ્યોગ સાથે સંકળાયેલા હજારો વેપારીઓ અને ઉદ્યમીઓ ઉપસ્થિત રહ્યા હતા.
કાર્યક્રમમાં ભાજપ ગુજરાતના વરિષ્ઠ પદાધિકારીઓ અને જનપ્રતિનિધિઓએ આગામી તહેવારો અને લગ્નસરાની સિઝનને ધ્યાનમાં રાખીને ફૂડ ઉદ્યોગ સાથે સંકળાયેલા વેપારીઓને માર્ગદર્શન આપ્યું હતું.
કાર્યક્રમમાં ભાજપ પ્રદેશ પ્રવક્તા ડો. અનિલભાઈ પટેલ, વેજલપુરના ધારાસભ્ય અમિતભાઈ ઠાકર, મ્યુનિસિપલ દંડક અતુલભાઈ મિશ્રા, પૂર્વ મંત્રી ડો. નિર્મલાબેન વાધવાણી, પૂર્વ સ્ટેન્ડિંગ ચેરમેન દેવાંગભાઈ દાણી, હેલ્થ એન્ડ સોલિડ વેસ્ટ ચેરમેન દીપકભાઈ પંચાલ, આહારના વાઇસ ચેરમેન રાકેશભાઈ પટેલ, આરોગ્ય વિભાગના વડા ડો. તેજસભાઈ શાહ અને આરોગ્ય અધિકારી સુરેશભાઈ ઓડ સહિતના મહાનુભાવો ઉપસ્થિત રહ્યા હતા.
ફૂડ ઉદ્યોગના અગ્રણીઓની હાજરી
મહા સેમિનારમાં ગુજરાતના અગ્રણી ફૂડ ઉદ્યોગકારો પણ મોટી સંખ્યામાં જોડાયા હતા. જેમાં ધ ગ્રાન્ડ ભગવતીના નરેન્દ્રભાઈ સોમાણી, ગોરધન થાળના ગોવર્ધનભાઈ પુરોહિત, ગ્વાલિયા સ્વીટના જયભાઈ શર્મા, જય હિન્દ સ્વીટના જસુભાઈ, જય ભવાની વડાપાઉંના કિશનસિંહજી, ઇસ્કોન ગાંઠિયાના મંદીપભાઈ, દાસ ખમણના કુણાલભાઈ ઠક્કર, ફરકીના હર્ષભાઈ, ગોપી ડાઇનિંગ હોલના દિલીપભાઈ ઠક્કર સહિતના ઉદ્યોગકારો હાજર રહ્યા હતા.
આ ઉપરાંત મીઠાઈ મહાજનના મહામંત્રી રાજેશભાઈ પટેલ, કેટરર્સ સંગઠનના ભવાનીસિંહ પુરોહિત સહિત હજારો વેપારીઓએ કાર્યક્રમમાં ભાગ લીધો હતો.
ફૂડ ક્ષેત્રમાં ઉત્કૃષ્ટ કામગીરી બદલ સન્માન
મહા સેમિનાર દરમિયાન ફૂડ ક્ષેત્રમાં નવીન અને નોંધપાત્ર કામગીરી કરનારા વ્યક્તિઓનું સન્માન કરવામાં આવ્યું હતું. ધુમાડામુક્ત ભારત અભિયાનને વેગ આપવા બદલ ધીરેન્દ્રભાઈ સુકુમાર, ભોજનને કલાકો સુધી તાજું રાખવાના સંશોધન માટે નૈનાબેન પાંચાલ, વિશાળ ફૂડ ચેઇન બનાવી રોજગાર સર્જન બદલ અમરીશભાઈ શાહ અને ફૂડ ઇન્ડસ્ટ્રી માટે નવી મશીનોની શોધ બદલ પાર્થભાઈ પંચાલનું સન્માન કરાયું હતું.
આ ઉપરાંત શૂન્યમાંથી વ્યવસાય ઊભો કરી રોજગાર સર્જન કરનારા ઓનેસ્ટના વિજયભાઈ ગુપ્તા, ઇસ્કોન ગાંઠિયાના મંદીપભાઈ, જય ભવાની વડાપાઉંના કિશનસિંહજી, ગ્રીન એન્વાયર્મેન્ટના જયભાઈ પટેલ, અંબિકા દાલવડાના ચંપાલાલજી ચંદેલ, સેવાભાવી ભૂપેશભાઈ પ્રજાપતિ અને સુભાષભાઈ ડોલિયાનું પણ સન્માન કરવામાં આવ્યું હતું.
ભેળસેળ મુક્ત ગુજરાતથી મિલેટને પ્રોત્સાહન સુધીના મુદ્દાઓ
મહા સેમિનારમાં ભેળસેળ મુક્ત ગુજરાત, ‘શુદ્ધ માટે યુદ્ધ’, વિકસિત ભારત 2047ના વિઝન હેઠળ દેશી અને પરંપરાગત વાનગીઓને વૈશ્વિક બ્રાન્ડ બનાવવી, શ્રી અન્ન (મિલેટ) દ્વારા ખેડૂતોની સમૃદ્ધિ, શ્રમિક સન્માન અને સ્વચ્છ, સ્વસ્થ, પ્લાસ્ટિક મુક્ત તથા ધુમાડામુક્ત ભારત જેવા મુદ્દાઓ પર ચર્ચા કરવામાં આવી હતી.
વિવિધ સેવા કાર્યોનું આયોજન
વડાપ્રધાન નરેન્દ્ર મોદીના જન્મદિવસ નિમિત્તે કાર્યક્રમ દરમિયાન વિવિધ સેવા કાર્યો પણ હાથ ધરવામાં આવ્યા હતા. અનાજમાંથી ‘અન્નનો આદર કરો’ સંદેશ સાથે વિશેષ રંગોળી બનાવવામાં આવી હતી અને 76 દીપ પ્રજ્વલિત કરવામાં આવ્યા હતા.
આ ઉપરાંત 76 આંગણવાડી બહેનો, 76 શ્રમિકો અને 76 દર્દીઓને નિઃશુલ્ક પૌષ્ટિક આહાર કીટનું વિતરણ કરવામાં આવ્યું હતું. શ્રમિકો માટે ઈ-શ્રમ યોજનાની નોંધણી, મેડિકલ કેમ્પ, આંખોની તપાસ અને ચશ્મા વિતરણની કામગીરી પણ કરવામાં આવી હતી.
ફૂડ લાઇસન્સ, મશીનરી પર સબસિડી અને અન્ય સરકારી યોજનાઓ અંગે સંબંધિત અધિકારીઓ દ્વારા વેપારીઓને માહિતી આપવામાં આવી હતી. મહિલા શક્તિ દ્વારા શ્રી અન્નમાંથી બનાવવામાં આવતી વિવિધ વાનગીઓની નિઃશુલ્ક સ્ટોલ પ્રદર્શની તેમજ ફૂડ મશીનરી અને આનુષંગિક ઉત્પાદનોની વેપાર પ્રદર્શનીનું પણ આયોજન કરાયું હતું.
દિવાળી માટે ‘મોદીજીનો સંદેશ ઘરે-ઘરે’ અભિયાનનો પ્રારંભ
કાર્યક્રમની મુખ્ય વિશેષતા તરીકે ‘મોદીજીનો સંદેશ ઘરે-ઘરે’ દિવાળી અભિયાનનો પ્રારંભ કરવામાં આવ્યો હતો. કાર્યક્રમમાં ઉપસ્થિત મીઠાઈ, બેકરી અને નમકીનના વેપારીઓએ સંકલ્પ લીધો હતો કે દિવાળીના તહેવાર દરમિયાન મીઠાઈના બોક્સ, બેકરી પેકિંગ અને નમકીન પેકિંગ પર ‘સ્વચ્છ ભારત’ના સંદેશવાળા સ્ટીકર લગાવવામાં આવશે.
આ પહેલના માધ્યમથી કરોડો પેકેટ અને બોક્સ દ્વારા સંદેશને લોકોના ઘર સુધી પહોંચાડવાનો સંકલ્પ લેવામાં આવ્યો હતો.
કાર્યક્રમને સફળ બનાવવા માટે વિદ્યુતભાઈ મહેતા, તુષારભાઈ પરિહાર, જિગ્નેશભાઈ લોઢા, બીનાબેન પાંડે, શીતલબેન, નારાયણભાઈ પ્રજાપતિ, ભેરારામજી સિરવી, મહેન્દ્રભાઈ દાસ, ચિરાગ બોહરા, નારાયણભાઈ પારગી, મુકેશભાઈ પારઘી, દેવારામજી પુરોહિત અને અજય બારોટ સહિતના આગેવાનો અને કાર્યકરોએ સહયોગ આપ્યો હતો.
