નવી દિલ્હી: દેશના અગ્રણી ક્વિક કોમર્સ પ્લેટફોર્મ Swiggy Instamartએ હિંદુસ્તાન પેટ્રોલિયમ કોર્પોરેશન લિમિટેડ (HPCL) સાથે ભાગીદારી કરીને ભારતની પ્રથમ On-Demand LPG સિલિન્ડર ડિલિવરી સેવા શરૂ કરવાની જાહેરાત કરી છે. આ પહેલ દ્વારા ઘર માટેની સૌથી જરૂરી વસ્તુઓમાંથી એક એવા LPG સિલિન્ડરને હવે ક્વિક કોમર્સ પ્લેટફોર્મ પર ઉપલબ્ધ કરવામાં આવશે. Instamart પર HPCLનો નવો ‘HP Navya’ 10 કિલો કોમ્પોઝિટ LPG સિલિન્ડર પણ ઉપલબ્ધ રહેશે.
આ સેવાની શરૂઆત સૌપ્રથમ બેંગલુરુ શહેરમાં કરવામાં આવશે. અહીં ગ્રાહકો HP Navya નામનો નવી પેઢીનો કોમ્પોઝિટ LPG સિલિન્ડર ઓર્ડર કરી શકશે. આ સિલિન્ડર સામાન્ય મેટલ સિલિન્ડર કરતાં વજનમાં હળવો, કાટમુક્ત (રસ્ટ-ફ્રી) અને વધુ અનુકૂળ છે.
HP Navya સિલિન્ડરની સૌથી મોટી ખાસિયત તેની ટ્રાન્સપેરન્ટ બોડી છે, જેના કારણે ગ્રાહકો સિલિન્ડર ખોલ્યા વગર જ અંદર કેટલો ગેસ બાકી છે તે સરળતાથી જાણી શકે છે. તેની કોમ્પેક્ટ ડિઝાઇનને કારણે આ સિલિન્ડર એપાર્ટમેન્ટમાં રહેતા લોકો, નાના પરિવારો, નોકરીયાત લોકો, વિદ્યાર્થીઓ તેમજ LPGના વધારાના વિકલ્પની જરૂર હોય એવા ઘરો માટે વધુ અનુકૂળ માનવામાં આવે છે. આ ઉપરાંત Instamart પર HPCLનો 5 કિલોનો મેટલ LPG સિલિન્ડર પણ ઉપલબ્ધ રહેશે.
આ સેવાની સૌથી મોટી વિશેષતા એ છે કે ગ્રાહકો પાસે પહેલાથી ઘરેલું LPG કનેક્શન હોવું જરૂરી નથી.
પ્રથમ વખત સિલિન્ડર ખરીદશો ત્યારે તેને નવા સિલિન્ડરની ખરીદી ગણવામાં આવશે.
ત્યારબાદના તમામ ઓર્ડર રિફિલ તરીકે ગણાશે.
રિફિલ ડિલિવરી સમયે ગ્રાહકે પોતાનો ખાલી HPCL સિલિન્ડર ડિલિવરી એજન્ટને પરત આપવાનો રહેશે.
હવે કરિયાણા પછી LPG સિલિન્ડર પણ મિનિટોમાં ઘરે પહોંચશે
Instamartના CEO અમિતેશ ઝાએ જણાવ્યું કે કંપનીએ કરિયાણાની વસ્તુઓથી આગળ વધીને હવે રોજિંદા જીવનની અન્ય જરૂરી સેવાઓ પણ ઉપલબ્ધ કરાવવાનો નિર્ણય લીધો છે. તેમણે જણાવ્યું કે HPCL સાથેની આ ભાગીદારી દ્વારા ગ્રાહકોને સુરક્ષા અને વિશ્વસનીયતાના તમામ ધોરણો જાળવી રાખીને હવે Instamart મારફતે LPG સિલિન્ડર પણ ઝડપથી ઘરે પહોંચાડવામાં આવશે.
