ભારતીય ક્રિકેટ ટીમ હવે ટી20 વર્લ્ડ કપ 2026ના ફાઇનલ મેચમાં ન્યૂઝીલેન્ડ સામે ટક્કર આપવા જઈ રહી છે. આ મેચ જીતીને ટીમ ઈન્ડિયા રેકોર્ડ ત્રીજો ટી20 વર્લ્ડ કપ જીતવાનો પ્રયાસ કરશે. પરંતુ સામે એવી ટીમ છે જે શાનદાર ફોર્મમાં છે. ખાસ કરીને જેમ સાઉથ આફ્રિકાને સેમિફાઈનલમાં હરાવીને ન્યૂઝીલેન્ડ ફાઈનલમાં પહોંચ્યું છે, ત્યારથી ભારત માટે પડકાર વધુ મોટો બન્યો છે. આ ફાઇનલ મેચમાં ભારતના 5 ખેલાડીઓ પર ખાસ નજર રહેશે. જો આ ખેલાડીઓ મેચમાં સારુ પરફોર્મન્સ કરશે તો ટીમ ઈન્ડિયાની ટ્રોફી જીતવાની શક્યતા ઘણી વધી જશે.
સૂર્યકુમાર યાદવ?
સૂર્યકુમાર યાદવ માત્ર ટીમના કેપ્ટન જ નથી, પરંતુ મધ્યક્રમમાં તેમની 360 ડિગ્રી બેટિંગ ભારત માટે સૌથી મોટું “એક્સ-ફેક્ટર” છે. આ ટૂર્નામેન્ટમાં તેઓ ભારત માટે બીજા સૌથી વધુ રન બનાવનાર બેટ્સમેન છે. દબાણની સ્થિતિમાં પણ શાંત રહીને રન બનાવવાની તેમની ક્ષમતા ટીમને મજબૂતી આપે છે. ન્યૂઝીલેન્ડના સ્પિનરો સામે તેમની સ્વીપ અને લૅપ શોટ ટીમને મોટા સ્કોર સુધી પહોંચાડવામાં મદદરૂપ થઈ શકે છે.
સંજુ સેમસન
સંજુ સેમસન હાલ તેમના કરિયરની શ્રેષ્ઠ ફોર્મમાં છે અને ભારતીય બેટિંગની મજબૂત કડી બની ગયા છે. સેમિફાઈનલમાં ઇંગ્લેન્ડ સામે 42 બોલમાં 89 રનની તોફાની ઇનિંગ અને વેસ્ટ ઇન્ડિઝ સામે નાબાદ 97 રનની પારી બતાવે છે કે તેઓ મોટા મેચોના ખેલાડી છે. તેમણે રોહિત શર્માનો એક સીઝનમાં સૌથી વધુ છગ્ગાનો રેકોર્ડ પણ તોડી નાખ્યો છે. તેમની આક્રમક બેટિંગ ન્યૂઝીલેન્ડના બોલરો પર દબાણ બનાવી શકે છે.
અભિષેક શર્મા
અભિષેક શર્મા આ ટૂર્નામેન્ટમાં હજુ સુધી ખાસ પ્રદર્શન કરી શક્યા નથી, પરંતુ તેઓ ટીમ માટે મોટો ટ્રમ્પ કાર્ડ બની શકે છે. ન્યૂઝીલેન્ડ સામે તાજેતરની સીરિઝમાં તેમની 35 બોલમાં 84 રનની ધમાકેદાર પારી હજુ પણ કીવી બોલરોને યાદ હશે.
જસપ્રીત બુમરાહ
જસપ્રીત બુમરાહ ભારતીય બોલિંગ આક્રમણના મુખ્ય સ્તંભ છે. તેઓ કોઈપણ સમયે મેચનું રુખ બદલી શકે છે. સેમિફાઈનલમાં જ્યાં રનની વરસાદ થઈ રહી હતી ત્યાં બુમરાહે કિફાયતી બોલિંગ કરી અને ડેથ ઓવરમાં તેમના સચોટ યોર્કરથી ભારતને જીત અપાવી. અમદાવાદની ઉછાળભરી પિચ પર તેમની ઝડપ અને વિવિધતા કીવી બેટ્સમેન માટે મોટી મુશ્કેલી બની શકે છે.
અક્ષર પટેલ
અક્ષર પટેલ પોતાની ચતુર સ્પિન બોલિંગ અને મેદાન પર શાનદાર ફીલ્ડિંગ માટે જાણીતા છે. સેમિફાઈનલમાં તેમણે Harry Brookનો અદ્ભુત કેચ લઈને ટીમમાં નવો જુસ્સો ભર્યો હતો. નીચલા ક્રમમાં તેમની બેટિંગ અને મધ્ય ઓવરમાં વિકેટ લેવાની ક્ષમતા તેમને મહત્વપૂર્ણ ઓલરાઉન્ડર બનાવે છે. જો આ પાંચ ખેલાડીઓ ફાઇનલમાં પોતાની શ્રેષ્ઠ રમત બતાવશે તો ટીમ ઈન્ડિયા માટે ત્રીજો ટી20 વર્લ્ડ કપ જીતવાનો રસ્તો ઘણી હદ સુધી સરળ બની શકે છે.
