ભારતનું યૂનિફાઈડ પેમેન્ટ ઈન્ટરફેસ એટલે કે, UPI ગ્લોબલ થતુ જઈ રહ્યું છે. દેશ જ નહીં વિદેશોમાં પણ UPIનો ડંકો વાગી રહ્યો છે. દુનિયાના ઘણા દેશ ભારતની ડિજિટલ પેમેન્ટ સિસ્ટમનો UPIનો ઉપયોગ કરી રહ્યા છે. હવે ઈઝરાયેલ પણ ભારતની UPI સિસ્ટમ સાથે જોડાવાનું છે. વડાપ્રધાન મોદીની ઈઝરાયેલ યાત્રા દરમિયાન બંને દેશોની વચ્ચે યૂપીઆઈને લઈને એક મોટો કરાર થયો છે. આ કરાર બાદ હવે ઈઝરાયેલમાં પણ ભારતના UPI દ્વારા રૂપિયાની લેવડ-દેવડ કરી શકાશે.
ભારતમાં UPI એટલું લોકપ્રિય છે કે, તે કેશ ટ્રાન્ઝેક્શનને પણ પાછળ છોડી ચૂક્યું છે. હજુ સુધી સિંગાપોર, યૂએઈ, ફ્રાન્સ અને નેપાળ સહિત 8થી વધારે દેશોમાં તેનો ઉપયોગ થઈ રહ્યો છે. ભારતના નાણા મંત્રાલયના અનુસાર, દેશના 57 ટકા ટ્રાન્ઝેક્શન હવે UPI દ્વારા જ થાય છે.
- ફ્રાન્સ: 2024માં UPI શરૂ કરનાર પ્રથમ યુરોપિયન દેશ. પેરિસમાં એફિલ ટાવર પર ટિકિટ ખરીદવા માટે UPIનો ઉપયોગ શરૂ થયો.
- સંયુક્ત અરબ અમીરાત: 2021માં UPI શરૂ થયું, દુબઈ મોલ અને અન્ય મુખ્ય સ્ટોર્સ પર QR કોડ ચુકવણીઓ ઉપલબ્ધ છે.
- ભૂટાન: 2021માં BHIM એપ્લિકેશનનો ઉપયોગ કરીને UPI ચુકવણીઓ શરૂ કરનાર પ્રથમ પડોશી દેશ.
- નેપાળ: ભારત અને નેપાળ વચ્ચે ક્રોસ-બોર્ડર UPI વ્યવહારો 2024માં શરૂ થયા.
- મોરિશિયસ: UPI અને RuPay કાર્ડ સેવાઓ 2024માં શરૂ થઈ, જેમાં કો-બ્રાન્ડેડ RuPay કાર્ડ્સને મોરિશિયસમાં સ્થાનિક કાર્ડ તરીકે માન્યતા આપવામાં આવશે.
- શ્રીલંકા: 2024માં UPI શરૂ થયું, જે બંને દેશો વચ્ચેના સંબંધોને વધુ મજબૂત બનાવશે.
- સિંગાપોર: 2023માં UPI શરૂ થયું, જેમાં તમામ રિટેલ સ્ટોર્સ અને પર્યટન સ્થળો પર QR કોડ ચુકવણીઓ ઉપલબ્ધ છે.
- ત્રિનિદાદ અને ટોબેગો: કેરેબિયન દેશ ત્રિનિદાદ અને ટોબેગોમાં BHIM એપ્લિકેશન દ્વારા ચુકવણીઓ હવે શક્ય છે.
UPI એક ડિજિટલ પેમેન્ટ સિસ્ટમ છે. જેનાથી તમે મોબાઈલ દ્વારા તરત જ રૂપિયા મોકલી અને મંગાવી શકો છો. આ સિસ્ટમને નેશનલ પેમેન્ટ કોર્પોરેશન ઓફ ઈન્ડિયાએ ડેવલપ કરી છે. યૂપીઆઈની મદદથી તમે 24×7 બેંક ખાતાથી સીધું ટ્રાન્ઝેક્શન કરી શકો છો. આમાં માત્ર મોબાઈલ નંબર, UPI ID કે QR કોડની જરૂર હોય છે. આ સિસ્ટમમાં IFSC કોડ કે એકાઉન્ટ નંબર યાદ રાખવાની જરૂર હોતી નથી.
