ગાંધીનગર: સ્નેહશિલ્પ ફાઉન્ડેશન દ્વારા આયોજિત શિલ્પ આરંભ ગિફ્ટ સિટી રન 4.0, જેને ક્રેસ્ટ ડેટા સિસ્ટમ્સ પ્રેઝન્ટ કરી રહ્યું છે, ફરી એકવાર યુવાનોમાં ફિટનેસ અને ડ્રગ્સ વિરોધી જાગૃતિ ફેલાવવા માટે તૈયાર છે. 22 ફેબ્રુઆરી, રવિવારે ગિફ્ટ સિટીના હરિયાળા પરિસરમાં યોજાનારી આ પહેલ નશામુક્ત અને સ્વસ્થ સમાજ તરફ એક મહત્વપૂર્ણ પગલું માનવામાં આવી રહી છે.
આ અભિયાનનો મુખ્ય હેતુ યુવાનોને નશાના ખતરાથી દૂર રાખી સ્વસ્થ, શિસ્તબદ્ધ અને સકારાત્મક જીવનશૈલી તરફ પ્રેરિત કરવાનો છે. બોલિવૂડ અભિનેતા અને ફિટનેસ આઈકન સુનિલ શેટ્ટી ઇવેન્ટ એમ્બેસેડર તરીકે જોડાશે. રાજ્યમંત્રી રીવાબા જાડેજા મુખ્ય અતિથિ તરીકે હાજરી આપશે, જ્યારે પર્યાવરણપ્રેમી અને ‘પોન્ડ મેન ઓફ ઈન્ડિયા’ તરીકે જાણીતા રામવીર તંવર વિશિષ્ટ અતિથિ તરીકે જોડાશે.
શિલ્પ આરંભ ગિફ્ટ સિટી રન 4.0નું આયોજન સેન્ટ્રલ પાર્ક ગિફ્ટ સિટી ખાતે થઈ રહ્યું છે. આ મેરેથોનનો સમય સવારે પાંચ વાગ્યાનો છે. જેમાં હાફ મેરેથોન, 5 અને 10 કિમીની કેટેગરી રાખવામાં આવી છે.
પાછલા ત્રણ સીઝનમાં આ મૂવમેન્ટે વિશાળ પ્રતિસાદ મેળવ્યો હતો — પ્રથમ સીઝનમાં 15 હજાર, બીજી સીઝનમાં 20 હજાર અને ત્રીજી સીઝનમાં 25 હજાર રનર્સ જોડાયા હતા.
આ વર્ષના ઇવેન્ટમાં કુલ ₹18 લાખના ઇનામ જાહેર કરવામાં આવ્યા છે. આયોજકોના જણાવ્યા મુજબ, શિલ્પ આરંભ હવે માત્ર મેરેથોન નહીં પરંતુ ફિટનેસ, જાગૃતિ અને ડ્રગ-ફ્રી ઈન્ડિયા માટેનું એક શક્તિશાળી સામાજિક મૂવમેન્ટ બની રહ્યું છે.
