રાજભવન, ગાંધીનગરમાં આજે ‘ભારત જોડો અભિયાન’ અંતર્ગત ‘સર્વ ધર્મ સમભાવ સભા’નું આયોજન કરવામાં આવ્યું હતું. રાજ્યપાલ આચાર્ય દેવવ્રતજી, મુખ્યમંત્રી ભૂપેન્દ્રભાઈ પટેલ અને ગૃહરાજ્યમંત્રી હર્ષભાઈ સંઘવીની ઉપસ્થિતિમાં મહર્ષિ દયાનંદ સભામંડપમ ખાતે આયોજિત આ સભામાં હિન્દુ, મુસ્લિમ, શીખ, ઈસાઈ, જૈન, પારસી, દાઉદી વોહરા સહિત તમામ ધર્મો-સંપ્રદાયોના આગેવાનો ઉપસ્થિત રહ્યા હતા.
આપણે ભારતવાસી ભિન્ન-ભિન્ન ભાષા, ધર્મ, સંપ્રદાય કે વેશભૂષામાં હોઈએ, આપણી ઓળખ એક જ છે-ભારતીય. આપણો એક જ સંકલ્પ છે કે, આપણો દેશ આપણી સીમાની સુરક્ષા માટે પ્રતિબદ્ધ છે ત્યારે આપણે સૌ; તમામ ધર્મો-સંપ્રદાયના લોકો આપણી સેનાની સાથે છીએ, આપણે સૌ ભારતની એકતાના પ્રહરી છીએ, આપણે સૌ ભારત સરકારના કોઈપણ સંકલ્પની સાથે છીએ : આવી વિભાવના સાથે આજે રાજભવનમાં સર્વ ધર્મ સમભાવ સભાનું આયોજન કરવામાં આવ્યું હતું.
આ ઐતિહાસિક અવસરે રાજ્યપાલ આચાર્ય દેવવ્રતજીએ તમામ ધર્મો અને સંપ્રદાયોના ધાર્મિક આગેવાનો અને પ્રબુદ્ધ પ્રતિનિધિઓને હૃદયપૂર્વક આવકારતાં કહ્યું હતું કે, વિવિધ સમુદાયોના આટલા બધા આદરણીય લોકોની રાજભવનમાં આગમન આપણી ભારતીય સંસ્કૃતિની સહિષ્ણુતા, એકતા અને આધ્યાત્મિક વારસાનું દર્શન છે.
તેમણે કહ્યું કે ભારતીયોએ ક્યારેય કોઈને કષ્ટ આપ્યું નથી, પરંતુ જ્યારે આપણી સહિષ્ણુતાને નબળાઈ તરીકે સમજવામાં આવે છે, ત્યારે સમયની માંગ છે કે, આપણે આપણા પ્રધાનમંત્રી નરેન્દ્ર મોદીજીના નેતૃત્વમાં ભારત સરકારે લીધેલા નિર્ણયોનું સમર્થન કરીએ. આજે, જ્યારે તમામ સમુદાયના લોકો અહીં એકસાથે હાજર છે અને સૌહાર્દપૂર્ણ વાતાવરણમાં પોતાની લાગણી અભિવ્યક્ત કરી રહ્યા છે, ત્યારે તે સ્પષ્ટ સંકેત છે કે જો આપણે આ ભાવના સાથે આગળ વધતા રહીશું, તો ભારત અવશ્ય એક સુખી, વિકસિત અને શાંતિપ્રિય રાષ્ટ્ર બની શકે છે.
રાજ્યપાલ આચાર્ય દેવવ્રતજીએ હિન્દુ, મુસ્લિમ, શીખ, ખ્રિસ્તી, દાઉદી વ્હોરા, પારસી અને જૈન સમુદાયો – વિવિધ ધર્મોના પ્રતિનિધિઓ દ્વારા પ્રસ્તુત કરવામાં આવેલા દેશભક્તિના ભાષણો સાંભળીને આનંદ વ્યક્ત કરતાં કહ્યું કે, આ વિચારો આ દેશની વાસ્તવિક તાકાત છે. ભારતનો સાંસ્કૃતિક વારસો અત્યંત સહિષ્ણુ અને આધ્યાત્મિક રહ્યો છે. ભારતે ઇતિહાસમાં ક્યારેય કોઈ દેશ પર વિજય મેળવવા માટે પોતાની સેના મોકલી નથી, પરંતુ તેના બદલે પ્રેમ, સહિષ્ણુતા અને કરુણાના સંદેશ સાથે પોતાના ધાર્મિક નેતાઓ અને સંતોને મોકલ્યા છે જેમણે વિશ્વના લોકોના દિલ જીતી લીધા છે.
આચાર્ય દેવવ્રતજીએ કટ્ટરતા અને અલગતાવાદની વૃત્તિઓને રાષ્ટ્ર માટે હાનિકારક ગણાવી અને કહ્યું કે, જ્યારે સમાજમાં ઉગ્રવાદ આવે છે, ત્યારે તે ભાઈચારા અને વિકાસના માર્ગને નષ્ટ કરે છે. તેમણે દરેકને વિનંતી કરી કે આપણે જે માટીમાં જન્મ્યા છીએ અને જે ખોરાક અને પાણીનો ઉપયોગ કરીએ છીએ તેનું રક્ષણ કરવું એ આપણી નૈતિક ફરજ છે. તેમણે કહ્યું કે ભારત માતાની રક્ષા માટે ભલે આપણે બલિદાન આપવું પડે, આપણે પાછળ હટવું જોઈએ નહીં.
આચાર્ય દેવવ્રતજીએ પોતાના સંદેશના સમર્થનમાં, તેમણે એક પક્ષી પરિવારની પ્રેરણાદાયી વાર્તા કહી, જે દર્શાવે છે કે ધર્મનો અર્થ છે પોતાની ફરજ બજાવવી – ભલે દુઃખ સહન કરવું પડે, પરંતુ જેણે આપણને ટેકો આપ્યો છે તેના પ્રત્યે કૃતજ્ઞ રહેવું અને આપણો ધર્મ બજાવવો એ ખૂબ જ મહત્વપૂર્ણ છે. તેમણે કહ્યું કે, આજે ધર્મનું પાલન કરવાનો સમય છે અને બધા ભારતીયોએ એકતા, ભાઈચારો અને રાષ્ટ્રીય સંરક્ષણની ભાવના સાથે આગળ વધવું જોઈએ. તેમણે ભાર મૂક્યો કે સોશિયલ મીડિયા અને અફવાઓથી સાવધ રહેવું જોઈએ અને સરકાર દ્વારા અધિકૃત માહિતી જ સ્વીકારવી જોઈએ.
રાજભવન ખાતે ‘ભારત જોડો અભિયાન’ અંતર્ગત આયોજિત સર્વધર્મ સમભાવ સભાને સંબોધતાં મુખ્યમંત્રી ભુપેન્દ્ર પટેલે કહ્યું હતું કે, પહેલગામના આતંકી હુમલા બાદ સમગ્ર દેશના નાગરિકોને અપેક્ષા હતી કે આતંકવાદ સામે કઠોર કાર્યવાહી કરવામાં આવે, ત્યારે વડાપ્રધાન નરેન્દ્રભાઈ મોદીના નેતૃત્વમાં ભારતીય સેનાએ ‘ઓપરેશન સિંદૂર’ દ્વારા આંતકવાદીઓનો સફાયો કર્યો છે. આજે આ સભામાં દરેક ધર્મના ધર્મગુરુઓએ ઉપસ્થિત રહીને પોતાના વક્તવ્ય થકી આપણે સૌ ભારતીયો એક છીએ તેવો સંદેશો આપીને ભારતીય સેનાનું મનોબળ અને જુસ્સો વધાર્યો છે તે પ્રશંસનીય છે. આતંકવાદનો કોઈ ધર્મ નથી હોતો, તેનો સેનાએ કડક જવાબ આપ્યો છે.
મુખ્યમંત્રીએ જણાવ્યું હતું કે, વડાપ્રધાનએ હંમેશા વિકાસની રાજનીતિ અપનાવી છે. તેમણે ‘સૌનો સાથ સૌનો વિકાસ’ અને સામાજિક સદભાવનો માર્ગ અપનાવ્યો છે. આપણે બધા અલગ નથી પણ એક છીએ તેની આ સભાના માધ્યમથી આપણે પ્રતિતિ કરાવી છે.
ગાંધીનગર ખાતે યોજાયેલી સર્વધર્મ સભામાં ઉપસ્થિત વિવિધ ધર્મ, સમુદાયના પ્રતિનિધિઓ તથા આગેવાનોને આવકારતાં ગૃહ રાજ્ય મંત્રી હર્ષ સંઘવીએ જણાવ્યું હતું કે, પ્રવર્તમાન સ્થિતિમાં આતંકવાદની નકારાત્મકતાને દૂર કરી ભારતીય સૈન્યનું મનોબળ વધુ મજબૂત બનાવવા માટે આપણે સૌએ સાથે મળીને લડવાનું છે. સૌ આગેવાનોએ એકતાનું પ્રતિક બનીને ભારત દ્વારા થતી કાર્યવાહીને સમર્થન આપી કોઈપણ પ્રકારની પરિસ્થિતિમાં દેશના પડખે ઊભા રહેવા એકજૂટ થવાનું છે.
ભારતે હંમેશા ‘વસુધૈવ કુટુમ્બકમ’ના મંત્રને પ્રાધાન્ય આપ્યું છે. ભારતમાં વિવિધતામાં એકતા રહેલી છે. હિન્દુ, મુસ્લિમ, શીખ, ઈસાઈ, જૈન, બૌદ્ધ,પારસી જેવા ધર્મો અહીં શાંતિપૂર્વક સહઅસ્તિત્વ ધરાવે છે,જે ભારતની આધ્યાત્મિક અને ધાર્મિક વિરાસતના દર્શન કરાવે છે.
પ્રવર્તમાન પરિસ્થિતિમાં ભારતીય સૈન્ય દેશની સુરક્ષા માટે શૌર્યપૂર્ણ કાર્યવાહી કરી રહ્યું છે. દેશની કટોકટીની આ સ્થિતિમાં તમામ ધર્મના લોકો એકજૂટ થઈને દેશની રક્ષા માટે સાથે ઊભા રહે તે ખૂબ જરૂરી છે.
