મધ્યપ્રદેશ એટીએસએ કટ્ટરપંથી ઇસ્લામિક સંગઠન હિઝબ-ઉત-તહરીર ના ૧૦ લોકોની ભોપાલથી ધરપકડ કરી છે. આ ઓપરેશન થયા બાદથી દેશમાં ભારે અજંપા ભરી સ્થિતિ સર્જાઇ છે. આ સંગઠન યુવાનોને હિન્દુઓ વિરુદ્ધ જેહાદ માટે તૈયાર કરી રહ્યું હતું. ભોપાલથી ૧૦, છિંદવાડાથી એક અને હૈદરાબાદથી પાંચ આરોપીઓની ધરપકડ કરવામાં આવી છે. પૂછપરછ દરમિયાન તેમણે અનેક મોટા ખુલાસા કર્યા હોવાનું જાણવા મળે છે. આ આતંકી સંગઠન ભોપાલના યુવાનોને તેમની સાથે જોડવા માંગતું હતું. માત્ર મુસ્લિમો જ નહીં તેઓ હિન્દુ યુવાનોને પણ પોતાના સંગઠનમાં સામેલ કરવાનું ષડયંત્ર રચી રહ્યા હતા. લોકોમાં ભય પેદા કરવા ઇચ્છતા હતા આ શખ્સો!…. આ સંસ્થામાં સામેલ લોકોને ફાળો અને સંસાધનો એકત્રિત કરવાની જવાબદારી સોંપવામાં આવી હતી. સંગઠનને મજબૂત બનાવ્યા બાદ આ આતંકીઓ લોકોમાં ભય પેદા કરવા માટે મોટા શહેરો અને ભીડભાડવાળા વિસ્તારોમાં ગંભીર ઘટનાઓને અંજામ આપવાની યોજના બનાવી રહ્યા હતા. મધ્યપ્રદેશની એટીએસે તેમના આ નાપાક ઇરાદાઓને નિષ્ફળ બનાવી દીધા છે અને આ તમામની ધરપકડ કરી લેવામાં આવી છે. દેશના મુખ્ય આ શહેરો હતા ટાર્ગેટ પર!… આતંક ફેલાવવા માટે ભારતના મોટા શહેરો ટાર્ગેટ પર હોવાનું હિઝબ ઉત-તહરીર ના આતંકવાદીઓ કબૂલ્યું છે. આ શખ્સો રેકી કરી રહ્યા હતા અને ઘણી જગ્યાએ ડ્રોનથી સર્વે પણ કરાવ્યો હતો. આ પછી તેઓ નકશો તૈયાર કરીને હુમલો કરવાનું કાવતરું ઘડ્યું હતું. કટ્ટરવાદ સામે એટીએસની મોટી કાર્યવાહી!… મધ્યપ્રદેશના મુખ્યમંત્રી શિવરાજસિંહ ચૌહાણે પોલીસને છૂટછાટ આપતા કહ્યું છે કે, રાજ્યમાં કોઈ પણ પ્રકારનો કટ્ટરવાદ હોય તો તેને તુરંત જ દૂર કરવામાં આવે. આ અભિયાન હેઠળ મધ્ય પ્રદેશ એટીએસે કટ્ટરપંથી ઇસ્લામિક સંગઠન હિઝ્બ ઉત્ તહરીર/ તહરીક-એ-ખિલાફત સાથે સંબંધ ધરાવતા સદસ્યો પર દેશની સૌથી મોટી કાર્યવાહી કરવામાં આવી હતી. એટીએસે ભોપાલના શાહજહાનાબાદ, એશબાગ, લાલઘાટી અને પિપલાની વિસ્તારમાંથી ૧૦ અને છિંદવાડામાંથી એકની ધરપકડ કરી હતી. જ્યારે હૈદરાબાદથી પાંચ સભ્યોને કસ્ટડીમાં લેવામાં આવ્યા છે.શું છે હિઝ્બ ઉત-તહરીર?… હિઝબ ઉત તહરીર એટલે કે તહરીક-એ-ખિલાફત સંગઠનનું નેટવર્ક ૫૦થી વધુ દેશોમાં ફેલાયેલું છે. આ સંગઠન પર ૧૬ દેશોમાં પ્રતિબંધ લગાવી દેવામાં આવ્યો છે.
આ સંગઠન ભારતમાં લોકશાહી શાસન વ્યવસ્થાને ઇસ્લામિક શરિયા કાયદાથી બદલવા માંગે છે. આ માટે સંગઠને મધ્યપ્રદેશમાં પણ ગુપ્ત રીતે પોતાની કેડર તૈયાર કરવાની શરૂઆત પણ કરી દીધી હતી. આ આરોપીઓની કરવામાં આવી ધરપકડ?… નવભારત ટાઈમ્સના અહેવાલ અનુસાર જો જણાવીએ તો, ભોપાલથી ધરપકડ કરાયેલા સંગઠનના સભ્યોમાં ૨૯ વર્ષીય યાસિર ખાન, સૈયદ સામી રિઝવી (૩૨ વર્ષ), મિસ્બાહ ઉલ હક (૨૯ વર્ષ), સૈયદ દાનિશ અલી, મેહરાજ અલી (૨૫ વર્ષ), ખાલિદ હુસૈન (૪૦ વર્ષ), વસીમ ખાન, મોહમ્મદ આલમ (૩૫ વર્ષ) સામાન્ય લોકો વચ્ચે કામ કરતી વખતે શંકાસ્પદ પ્રવૃત્તિઓ કરી રહ્યા હતા.
અહીં ઉલ્લેખનીય છે કે, અગાઉ મધ્યપ્રદેશ પોલીસ દ્વારા જમાત-એ-મુજાહિદ્દીન-બાંગ્લાદેશ (જેએમબી) અને પીએફઆઈ જેવા સંગઠનો પર કાર્યવાહી કરવામાં આવી છે. જમાત-એ-મુજાહિદ્દીન બાંગ્લાદેશના મોડ્યુલનો એટીએસ દ્વારા માર્ચ ૨૦૨૨માં પર્દાફાશ કરવામાં આવ્યો હતો. આ દરમિયાન ત્રણ બાંગ્લાદેશી આતંકીઓની ધરપકડ કરવામાં આવી હતી. સપ્ટેમ્બર ૨૦૨૨માં મધ્યપ્રદેશ પોલીસને પ્રતિબંધિત સંગઠન પીએફઆઈના ૨૨ સભ્યોની ધરપકડ કરવામાં સફળતા મળી હતી. ટ્રેનિંગ લઇને કરતા હતા ભરતી!… પકડાયેલા તમામ આરોપીઓ ગુપ્ત રીતે જંગલોમાં ક્લોઝ કોમ્બેટ ટ્રેનિંગ કેમ્પનું આયોજન કર્યું હતું અને શૂટિંગની પ્રેક્ટિસ કરી હતી. હૈદરાબાદથી સંસ્થાના કુશળ ટ્રેનર્સ શિબિરમાં સામેલ સભ્યોને તાલીમ આપતા હતા. ગુપ્ત રીતે ધાર્મિક મેળાવડાનું આયોજન કરીને ઉશ્કેરણીજનક ભાષણો આપવામાં આવ્યા હતા. તેમજ જેહાદી સાહિત્યનું પણ વિતરણ કરવામાં આવ્યું હતું. આરોપીઓ આક્રમક સ્વભાવ ધરાવતા અને સંગઠન માટે પોતાનો જીવ કુરબાન કરવામાં કોઈ સંકોચ ન અનુભવે તેવા લોકોને ભરતી કરતાં હતાં. તમામ આરોપીઓએ એકબીજા સાથે વાતચીત કરવા માટે ડાર્ક વેબની કોમ્યુનિકેશન એપ્સ રોકેટ ચેટ, થ્રીમા અને અન્ય એપ્સનો ઉપયોગ કર્યો હતો. જેનો ઉપયોગ મોટાભાગે ISIS જેવા આતંકવાદી સંગઠનો દ્વારા કરવામાં આવે છે. હાલ આ કેસમાં વધારે તપાસ ચાલી રહી છે.
