સુરત: ગુજરાતના સુરતના લસકાણા વિસ્તારમાં 30 વર્ષીય યુવક અમરબાબુ નિષાદની હત્યાના કેસમાં પોલીસે ચોંકાવનારો ખુલાસો કર્યો છે. યુવકની હત્યા કોઈ બહારની વ્યક્તિએ નહીં, પરંતુ તેની પત્ની રીનાદેવી અને સગા નાના ભાઈ શિવા ઉર્ફે શિવાબાબુએ સાથે મળીને કરી હતી. પોલીસે બંને આરોપીઓની ધરપકડ કરી લીધી છે.
મૂળ ઉત્તર પ્રદેશના હમીરપુર જિલ્લાના રહેવાસી અમરબાબુનો મૃતદેહ 10 નવેમ્બરના રોજ લસકાણામાં ડીજીવીસીએલ બીઆરટીએસ બસ સ્ટેન્ડની સામે સર્વિસ રોડ પરથી મળી આવ્યો હતો. તપાસ દરમિયાન સામે આવ્યું હતું કે તેનું ગળું દબાવીને હત્યા કરવામાં આવી હતી.
એક વર્ષથી ચાલી રહ્યો હતો પ્રેમસંબંધ
પોલીસના જણાવ્યા અનુસાર, મૃતકની પત્ની રીનાદેવી (29) અને તેના નાના ભાઈ શિવાબાબુ (27) વચ્ચે છેલ્લા એક વર્ષથી પ્રેમસંબંધ હતો. અમરબાબુને દારૂ પીવાની લત હતી અને તે અવારનવાર તેની પત્ની સાથે મારપીટ કરતો હતો તેમજ ઝઘડા કરતો હતો. આ જ કારણોસર બંનેએ તેને રસ્તામાંથી હટાવવાનું કાવતરું ઘડ્યું હતું. બંને છેલ્લા દોઢ મહિનાથી હત્યાનું આયોજન કરી રહ્યાં હતાં.
200 રૂપિયામાં ઓટો ભાડે કર્યો અને દોરડાનો ફંદો બનાવ્યો
ઘટનાની રાત્રે અમરબાબુ દારૂના નશામાં ઘરની બહાર નીકળ્યો હતો. તેને શોધવા નીકળેલા શિવાબાબુએ 200 રૂપિયા આપીને એક ઓટોરિક્ષા ભાડે કરી હતી અને નશામાં ધૂત પોતાના ભાઈને એક અવાવરું સ્થળે લઈ ગયો હતો. ત્યાં ઊભેલી બસની આડમાં તેને સુવડાવી દીધો હતો.
ત્યારબાદ ડિસ્પ્લે પર સામાન લટકાવવા માટે ઉપયોગમાં લેવાતા દોરડાનો ફંદો બનાવીને પોતાના ભાઈનું ગળું દબાવી હત્યા કરી નાખી હતી. હત્યા કર્યા બાદ મૃતદેહને જલારામ મંદિરથી વિપુલનગર તરફ જતા સર્વિસ રોડ પર ફેંકીને તે ઘરે પરત ફર્યો હતો.
CCTV ફૂટેજથી હત્યાનો ભેદ ઉકેલાયો
હત્યાની ઘટના બાદ લસકાણા પોલીસે આસપાસના CCTV ફૂટેજ તપાસ્યા હતા. ટેકનિકલ સર્વેલન્સ અને બાતમીદારોની મદદથી તપાસ આગળ વધારવામાં આવી હતી. પરિવારના સભ્યોની ગતિવિધિઓ શંકાસ્પદ જણાતાં મૃતકની પત્ની અને નાના ભાઈની પૂછપરછ કરવામાં આવી હતી.
પોલીસના જણાવ્યા અનુસાર, પૂછપરછ દરમિયાન બંનેએ હત્યાનું કાવતરું ઘડ્યું હોવાની અને ઘટનામાં પોતાની ભૂમિકા હોવાની કબૂલાત કરી હતી. પોલીસે બંનેની ધરપકડ કરીને આગળની કાયદેસરની કાર્યવાહી હાથ ધરી છે.
