અમદાવાદ: દિવાળીના તહેવારની ખુશીઓ દરેક પરિવાર સુધી પહોંચે અને કોઈ જરૂરિયાતમંદ પરિવાર ઉજવણીથી વંચિત ન રહે તેવા ઉમદા હેતુ સાથે ડ્રીમ ફાઉન્ડેશન દ્વારા ‘પ્રોજેક્ટ ફૂડ ફોર ઓલ’ અંતર્ગત રાશન કીટ વિતરણ કાર્યક્રમ યોજાયો હતો. આ અભિયાન હેઠળ અમદાવાદના 180થી વધુ જરૂરિયાતમંદ પરિવારોને દિવાળી રાશન કીટનું વિતરણ કરવામાં આવ્યું હતું.
આ સેવાકાર્યમાં TTEC India Foundationનો કોર્પોરેટ સોશિયલ રિસ્પોન્સિબિલિટી (CSR) અંતર્ગત સહયોગ મળ્યો હતો. આ પહેલ દ્વારા જરૂરિયાતમંદ પરિવારો પણ દિવાળીના તહેવારની ખુશીઓ સાથે ઉજવણી કરી શકે તેવો પ્રયાસ કરવામાં આવ્યો હતો.
TTEC India Foundationનો CSR સહયોગ
TTEC India Foundationના CSR ઇન્ચાર્જ યુગ ચાવડાએ જણાવ્યું હતું કે, “દિવાળી ખુશીઓનો તહેવાર છે અને આ ખુશીઓ દરેક પરિવાર સુધી પહોંચવી જોઈએ. કોઈપણ જરૂરિયાતમંદ પરિવાર દિવાળીની ઉજવણીથી વંચિત ન રહે તેવા વિચાર સાથે અમે ડ્રીમ ફાઉન્ડેશનની આ પહેલમાં જોડાયા છીએ. સમાજ માટે કંઈક સારું કરવાનો અને જરૂરિયાતમંદ પરિવારોની ખુશીમાં સહભાગી બનવાનો અમને આનંદ છે.”
કુષ્ઠરોગથી પીડિત પરિવારોને પણ રાશન કીટ આપી
આ અભિયાન અંતર્ગત અમદાવાદના વસ્ત્રાલ વિસ્તારમાં રહેતા કુષ્ઠરોગથી પીડિત પરિવારોને પણ દિવાળી રાશન કીટનું વિતરણ કરવામાં આવ્યું હતું. સમાજના દરેક વર્ગ સુધી મદદ પહોંચે અને દરેક પરિવાર તહેવારની ખુશીઓ માણી શકે તે માટે સંસ્થાએ વિશેષ પ્રયાસ કર્યો હતો.
સમગ્ર કાર્યક્રમને સફળ બનાવવા અંદાજે 15 સ્વયંસેવકોએ ઉત્સાહપૂર્વક સહયોગ આપ્યો હતો. સ્વયંસેવકોએ રાશન કીટના વિતરણ સહિતની કામગીરીમાં મહત્વપૂર્ણ ભૂમિકા ભજવી હતી.
જરૂરિયાતમંદ પરિવારોના સ્વમાન અને ગોપનીયતાને પ્રાથમિકતા
ડ્રીમ ફાઉન્ડેશનના સ્થાપક નિરવ શાહે TTEC India Foundationની સમગ્ર ટીમ, ધર્મેન્દ્ર કુમાર, યુગ ચાવડા અને તમામ સ્વયંસેવકોનો આભાર વ્યક્ત કર્યો હતો.
તેમણે જણાવ્યું હતું કે, જરૂરિયાતમંદ પરિવારો સુધી મદદ પહોંચાડવાની સાથે તેમના સ્વમાન અને ગોપનીયતાનું જતન કરવું પણ સંસ્થાની પ્રાથમિકતા છે.
ડ્રીમ ફાઉન્ડેશન દ્વારા શિક્ષણ, મહિલા અને બાળ કલ્યાણ તેમજ જરૂરિયાતમંદ પરિવારોના ઉત્થાન માટે વિવિધ સેવાકીય પ્રવૃત્તિઓ હાથ ધરવામાં આવે છે.
દિવાળીની સાચી ખુશી ત્યારે છે જ્યારે આપણા સહયોગથી કોઈ જરૂરિયાતમંદ પરિવારના ઘરમાં પણ ખુશીનો દીપ પ્રગટે. ‘પ્રોજેક્ટ ફૂડ ફોર ઓલ’ દ્વારા ડ્રીમ ફાઉન્ડેશને આ જ માનવતા અને સામાજિક સહભાગિતાનો સંદેશ આપ્યો છે.
