જો તમે ટ્રેનમાં લાંબા અંતરની મુસાફરી કરી રહ્યા છો અને રસ્તામાં કોઈ શહેરમાં અથવા સગાં-સંબંધીઓના ઘરે થોડા સમય માટે રોકાવા માંગો છો, તો ભારતીય રેલવેનો એક ખાસ નિયમ તમારા માટે ખૂબ ઉપયોગી થઈ શકે છે. સામાન્ય રીતે લોકોને એવું લાગે છે કે રસ્તામાં ઉતરીને ફરીથી ટ્રેનમાં મુસાફરી શરૂ કરવા માટે નવી ટિકિટ લેવી પડે છે. પરંતુ રેલવેના બ્રેક ઑફ જર્ની (Break of Journey) નિયમ હેઠળ કેટલીક શરતોને આધીન એક જ ટિકિટ પર મુસાફરી વચ્ચે રોકીને પછી આગળની મુસાફરી ચાલુ રાખી શકાય છે.
તમે ઇચ્છો તો એક જ ટ્રેનની ટિકિટ પર મુસાફરી વચ્ચે રોકાઈને બીજા દિવસે ફરી મુસાફરી શરૂ કરી શકો છો. જોકે, આ માટે કેટલાક નિયમો અને શરતો જાણવી જરૂરી છે.
શું છે બ્રેક જર્નીના નિયમો અને શરતો?
ભારતીય રેલવેના નિયમો અનુસાર, જો કોઈ મુસાફર એક જ મુસાફરીની ટિકિટ લઈને 500 કિલોમીટરથી વધુ અંતરની મુસાફરી કરી રહ્યો હોય, તો તેને રસ્તામાં ચોક્કસ શરતોને આધીન કોઈ સ્ટેશન પર મુસાફરી રોકવાની મંજૂરી મળી શકે છે. આ નિયમને બ્રેક જર્ની કહેવામાં આવે છે.
જો મુસાફરીનું કુલ અંતર 500 કિલોમીટરથી વધુ હોય, તો મુસાફર રસ્તામાં કોઈ એક સ્ટેશન પર વધુમાં વધુ બે દિવસ માટે મુસાફરી રોકી શકે છે. જોકે, આ સુવિધાનો લાભ શરૂઆતના સ્ટેશનથી 500 કિલોમીટરનું અંતર પૂર્ણ કર્યા પછી જ લઈ શકાય છે.
જો ટિકિટ 1,000 કિલોમીટરથી વધુ અંતરની હોય, તો નિયમો અનુસાર મુસાફર રસ્તામાં બે વખત બ્રેક જર્ની લઈ શકે છે.
બ્રેક જર્ની દરમિયાન આ બાબતોનું ધ્યાન રાખો
મુસાફરી વચ્ચે રોકાવા માટે તમે જે સ્ટેશન પર ઉતરો છો, ત્યાંના સ્ટેશન માસ્ટર અથવા અધિકૃત રેલવે કર્મચારી પાસે તમારી ટિકિટ પર જરૂરી નોંધ કરાવવી જરૂરી છે. આ નોંધમાં સ્ટેશનનો કોડ અને સ્ટેમ્પ જેવી વિગતોનો સમાવેશ થઈ શકે છે. જો તમે જરૂરી નોંધ કરાવ્યા વગર મુસાફરી વચ્ચે રોકાઈ જાઓ, તો નિયમો અનુસાર મુશ્કેલી ઊભી થઈ શકે છે અને દંડ પણ ભરવો પડી શકે છે.
તમારે એ પણ ધ્યાનમાં રાખવું જોઈએ કે આ સુવિધા રાજધાની એક્સપ્રેસ, શતાબ્દી એક્સપ્રેસ અને જનશતાબ્દી જેવી પ્રીમિયમ ટ્રેનોમાં લાગુ પડતી નથી, કારણ કે આ ટ્રેનોના ભાડા અને ટિકિટની વ્યવસ્થા અલગ હોય છે.
ઇન્ટરનેટ પરથી બુક કરેલી ઈ-ટિકિટમાં પણ બ્રેક જર્નીની આ સુવિધા સીધી રીતે ઉપલબ્ધ હોતી નથી. આ ઉપરાંત, સ્લીપર અથવા એસી કોચમાં મુસાફરી દરમિયાન વચ્ચેના સ્ટેશન પર ઉતરી જવાથી તમારી અગાઉની બર્થ કે સીટ સુરક્ષિત રહેવાની ખાતરી હોતી નથી. આગળની મુસાફરી માટે લાગુ પડતા રેલવેના નિયમોનું પાલન કરવું પડે છે.
મહત્ત્વપૂર્ણ નોંધ: બ્રેક જર્ની માટેના નિયમો ટિકિટના પ્રકાર, મુસાફરીના અંતર અને લાગુ પડતી રેલવેની શરતો પ્રમાણે બદલાઈ શકે છે. મુસાફરી વચ્ચે રોકાવાનું આયોજન કરતાં પહેલાં ભારતીય રેલવેની સત્તાવાર માહિતી અથવા સંબંધિત રેલવે અધિકારી પાસેથી નિયમોની પુષ્ટિ કરી લેવી.
