ભારતનું અમીર ગામ: અહીં 15 વર્ષની ઉંમરનાં બાળકો પણ છે લખપતિ, ઘરે ઘરે છે લક્ઝિરી કાર

Rudra
3 Min Read

ગામડાંની સંસ્કૃતિ અને ભોજન સૌને આકર્ષે છે. હવે ગામડાં પણ વિકાસની દોડમાં ઝડપથી આગળ વધી રહ્યાં છે. કેટલાંક ગામો તેમની સાદગી માટે તો કેટલાંક તેમની સમૃદ્ધિ માટે જાણીતા છે. આવું જ એક ગામ મધ્યપ્રદેશમાં પણ આવેલું છે, જ્યાં બાળકો પણ લખપતિ છે. અહીંના ગ્રામજનોએ મર્યાદિત સંસાધનોનો ઉપયોગ કરીને પોતાની કિસ્મત બદલી નાખી છે. આ ગામના દરેક ખેડૂત પાસે ટ્રેક્ટર અને લક્ઝરી કાર છે. અહીંના ખેડૂતો ખેતી ઉપરાંત અનેક પ્રકારના વ્યવસાય સાથે પણ જોડાયેલા છે. ચાલો જાણીએ કે મધ્યપ્રદેશમાં આ સમૃદ્ધ ગામ ક્યાં આવેલું છે.

મધ્યપ્રદેશનો સેહોર જિલ્લો ઘઉંના ઉત્પાદન માટે સમગ્ર દેશમાં જાણીતો છે. આ જિલ્લામાં ઉગાડવામાં આવતું શરબતી ઘઉં સૌથી મોંઘા ઘઉંમાં ગણાય છે. અહીંની કાળી અને કાંપવાળી જમીન ખેતી માટે ખૂબ જ ઉપજાઉ છે. મધ્યપ્રદેશના સેહોર અને વિદિશા વિસ્તારોમાં આવી જમીન જોવા મળે છે. નર્મદા નદીના કાંઠાનો વિસ્તાર પણ અહીંની જમીનને વધુ ફળદ્રુપ બનાવે છે. સેહોર જિલ્લાના જાવર તાલુકામાં સેમરી ગામ આવેલું છે. આ ગામ સમૃદ્ધ ગામોમાં સામેલ છે, જ્યાંના ખેડૂતો પાસે ટ્રેક્ટર અને લક્ઝરી કાર છે.

ગામનાં બાળકો પણ કરે છે કમાણી

આ ગામના ખેડૂતો પાસે મોટી જમીન છે. સૌથી રસપ્રદ વાત એ છે કે અહીં 15થી 16 વર્ષનાં બાળકો પણ રોજગાર સાથે જોડાયેલાં છે. કોઈ દૂધની ડેરી ચલાવે છે, તો કોઈ કરિયાણાની દુકાન ધરાવે છે. જ્યારે કેટલાક બાળકો સિમેન્ટ અને સળિયાની એજન્સી જેવા વ્યવસાય સાથે પણ જોડાયેલા છે. ગામના મોટા ખેડૂતોનાં બાળકો ઇન્દોર અને ભોપાલ જેવાં મોટાં શહેરોમાં રહે છે. આ ગામના અનેક ખેડૂતોનાં શહેરોમાં પણ મકાન છે. ગામમાં મોટાભાગનાં ખેડૂતોનાં પાકાં મકાનો જોવા મળે છે.

ખેતી અને પશુપાલનથી થાય છે સારી કમાણી

આ ગામના ખેડૂતો મુખ્યત્વે ઘઉં, ચણા, સોયાબીન, લસણ અને ડુંગળીની ખેતી કરે છે. તેઓ પાકનો યોગ્ય રીતે સંગ્રહ કરે છે અને બજારમાં સારા ભાવ મળે ત્યારે પાક વેચીને સારી કમાણી કરે છે.

ખેતી ઉપરાંત ગામના ખેડૂતો ગીર ગાયનું પાલન પણ કરે છે. ગામમાં જ દૂધની ડેરી આવેલી છે. અહીંનાં ઘણાં બાળકો શાળાએ જતાં પહેલાં જ પોતાના વ્યવસાયમાં કામ કરે છે. તેઓ ડેરી ચલાવીને આવક મેળવે છે.

ગામના 15 વર્ષના પુષ્પરાજ નામના બાળકે જણાવ્યું હતું કે તે દરરોજ 60 લિટર દૂધ ખરીદે છે અને તેના વેચાણમાંથી મહિને અંદાજે 30થી 35 હજાર રૂપિયાની કમાણી કરે છે. તે દૂધ પ્રતિ લિટર 80 રૂપિયાના ભાવે વેચે છે. આ રીતે ગામના બાળકો નાની ઉંમરથી જ વ્યવસાય અને કમાણી સાથે જોડાઈને આત્મનિર્ભર બનવાનો પ્રયાસ કરી રહ્યાં છે.

Share This Article