દિગ્ગજ અભિનેતા નાના પાટેકરનું ગુરુવારે સવારે નિધન થયું છે. રિપોર્ટ અનુસાર તેઓને ગોવામાં પોતાના ઘરે હાર્ટ એટેક આવ્યો હતો. તેને આશરે 45 મિનિટ સુધી CPR આપવામાં આવ્યું હતુ, પરંતુ તેઓને બચાવી શકાયા નહીં. મણિપાલ હોસ્પિટલના ડો. શેખર સાલકર અનુસાર નાના પાટેકરનું સવારે 5.20 વાગ્યે નિધન થયું હતુ. તેઓના નિધન પછી મેડિકો લીગલ કેસ (MLC)નોંધાવવામાં આવ્યો છે અને પોસ્ટમોર્ટમ કરાવવામાં આવશે.
3 નેશનલ એવોર્ડ જીત્યા
1989માં આવેલી ફિલ્મ ‘પરિંદા’માં નાના પાટેકરે અન્નાનું પાત્ર ભજવ્યું હતું. આ ભૂમિકા માટે તેમને બેસ્ટ સપોર્ટિંગ એક્ટરનો નેશનલ ફિલ્મ એવોર્ડ મળ્યો હતો. ત્યારબાદ 1994માં આવેલી ફિલ્મ ‘ક્રાંતિવીર’ માટે તેમને બેસ્ટ એક્ટરનો નેશનલ એવોર્ડ મળ્યો.
1996માં આવેલી ફિલ્મ ‘અગ્નિસાક્ષી’ માટે પણ તેમને બેસ્ટ સપોર્ટિંગ એક્ટરનો નેશનલ ફિલ્મ એવોર્ડ મળ્યો હતો. આ રીતે નાના પાટેકરને પોતાની કારકિર્દીમાં કુલ 3 નેશનલ ફિલ્મ એવોર્ડ મળ્યા છે. ભારતીય સિનેમામાં તેમના યોગદાન બદલ વર્ષ 2013માં તેમને પદ્મશ્રીથી સન્માનિત કરવામાં આવ્યા હતા. લાંબી ફિલ્મી કારકિર્દી દરમિયાન તેમણે હિન્દીની સાથે-સાથે મરાઠી ફિલ્મોમાં પણ કામ કર્યું છે.
2007માં આવેલી ફિલ્મ ‘વેલકમ’માં નાના પાટેકરે ગેંગસ્ટર ઉદય શેટ્ટીનું પાત્ર ભજવ્યું હતું. તેમની આ કોમેડી ભૂમિકાને દર્શકોએ ખૂબ પસંદ કરી હતી. તેઓ ફિલ્મની સિક્વલ ‘વેલકમ બેક’માં પણ ઉદય શેટ્ટીના પાત્રમાં જોવા મળ્યા હતા.
ફિલ્મ ‘પ્રહાર’ માટે લીધી હતી સૈન્ય તાલીમ
નાના પાટેકરે ફિલ્મ ‘પ્રહાર: ધ ફાઇનલ એટેક’માં આર્મી મેજરની ભૂમિકા ભજવવા માટે ભારતીય સેનાની મરાઠા લાઇટ ઇન્ફન્ટ્રી સાથે સૈન્ય તાલીમ લીધી હતી. આ દરમિયાન તેમણે લગભગ ત્રણ વર્ષ સુધી તાલીમ મેળવી હતી. તાલીમ પૂર્ણ કર્યા બાદ નાના પાટેકર ટેરિટોરિયલ આર્મી સાથે જોડાયા હતા. તેમને માનદ કેપ્ટન તરીકે કમિશન મળ્યું હતું. ત્યારબાદ તેમણે લેફ્ટનન્ટ કર્નલના માનદ પદ સુધી સેવાઓ આપી હતી અને વર્ષ 2013માં નિવૃત્ત થયા હતા.
કારગિલ યુદ્ધ દરમિયાન પણ સેનાની સાથે રહ્યા
1999ના કારગિલ યુદ્ધ દરમિયાન પણ નાના પાટેકરનું ભારતીય સેના સાથેનું જોડાણ જોવા મળ્યું હતું. અહેવાલો અનુસાર, તેમણે તત્કાલીન રક્ષા મંત્રી જ્યોર્જ ફર્નાન્ડિસ પાસેથી વિશેષ મંજૂરી મેળવીને લગભગ 2થી 3 અઠવાડિયા એટલે કે 15થી 20 દિવસ સુધી સેનાની સાથે અગ્રિમ વિસ્તારોમાં સમય પસાર કર્યો હતો.
આ દરમિયાન તેઓ દ્રાસ, લેહ, કુપવાડા અને સોપો જેવા વિસ્તારોમાં ગયા હતા. અહેવાલોમાં એવું પણ જણાવવામાં આવ્યું છે કે તેમણે સેનાની ક્વિક રિએક્શન ટીમ (QRT) સાથે પણ સમય પસાર કર્યો હતો.
નાના પાટેકરે એક ઇન્ટરવ્યૂમાં કહ્યું હતું કે દેશ માટે દરેક વ્યક્તિએ પોતાની તરફથી કંઈક ને કંઈક યોગદાન આપવું જોઈએ. ભારતીય સેનાના જવાનો પ્રત્યેનો તેમનો આદર અનેક પ્રસંગોએ જોવા મળ્યો છે. વર્ષ 2016માં તેમણે કહ્યું હતું કે તેમના માટે દેશ સૌથી પહેલા છે અને સૈનિકો જ દેશના સાચા હીરો છે.
