આજે ભલે કેટરીના કૈફની જિંદગી બોલિવૂડ સ્ટારડમ, લક્ઝરી અને સફળ બિઝનેસ સાથે જોડાયેલી હોય, પરંતુ તેમની માતાની દુનિયા તેનાથી બિલકુલ અલગ છે. વર્ષ 2003માં બોલિવૂડમાં ડેબ્યૂ કર્યા બાદ કેટરીના ‘નમસ્તે લંડન’, ‘પાર્ટનર’, ‘વેલકમ’ અને ‘સિંહ ઇઝ કિંગ’ જેવી અનેક સફળ ફિલ્મોમાં જોવા મળી અને ધીમે-ધીમે ખૂબ લોકપ્રિય બની. જોકે, કેટરીના પ્રસિદ્ધિની ઊંચાઈએ પહોંચ્યા ત્યારે તેમની માતાએ ગ્લેમરની દુનિયાથી દૂર તમિલનાડુના એક ગામમાં રહેવાનું પસંદ કર્યું. કેટરીનાની માતાએ પોતાનું જીવન ચેરિટી, શિક્ષણ અને વંચિત વર્ગના બાળકોની મદદ માટે સમર્પિત કર્યું છે. તેઓ ત્યાં લક્ઝરી સુવિધાઓ વિના અને મર્યાદિત વીજળીની સુવિધા વચ્ચે રહે છે.
આ સફરની શરૂઆત વર્ષ 2008માં થઈ હતી. લંડનમાં રહેતી કેટરીનાની માતા સુઝેન ટરકોટ તમિલનાડુ આવી અને ગ્રામ્ય વિસ્તારોના બાળકોનું ભવિષ્ય સુધારવાના હેતુથી ‘રિલીફ પ્રોજેક્ટ્સ ઈન્ડિયા’ નામની NGO શરૂ કરી. ફિલ્મ ઈન્ડસ્ટ્રીની ચમકદાર દુનિયાથી દૂર કેટરીના કૈફની માતા સુઝેન ટરકોટ છેલ્લા લગભગ બે દાયકાથી મદુરાઈ નજીક આવેલા તમિલનાડુના એક ગામમાં રહીને શાંતિથી લોકોના જીવનમાં પરિવર્તન લાવવાનું કામ કરી રહ્યાં છે. અહીં પોતાની ચેરિટી સંસ્થા ‘રિલીફ પ્રોજેક્ટ્સ ઈન્ડિયા’ અને ‘માઉન્ટેન વ્યૂ સ્કૂલ’ ચલાવવા માટે તેમને ઘણીવાર દિવસમાં 12 કલાક સુધી વીજળીના કાપ અને મર્યાદિત ઈન્ટરનેટ જેવી સમસ્યાઓનો સામનો કરવો પડે છે.
મુંબઈમાં પોતાની સફળ ફિલ્મી કારકિર્દી ચાલુ રાખવા છતાં કેટરીના પોતાની માતાના આ પ્રેરણાદાયક કામ પર ખૂબ ગર્વ અનુભવે છે અને તેમને સંપૂર્ણ સહયોગ આપે છે. જરૂરિયાતમંદ બાળકોને શિક્ષણ આપવામાં મદદ કરતી આ બિનનફાકારક સંસ્થાને ચલાવવા માટે કેટરીના નિયમિત રીતે આર્થિક યોગદાન પણ આપે છે. ‘રિલીફ પ્રોજેક્ટ્સ ઈન્ડિયા’ની શરૂઆત સરકારી શાળાઓમાં અભ્યાસ કરતા વિદ્યાર્થીઓ માટે મફત સાંજની ટ્યુશન ક્લાસના નાના નેટવર્ક તરીકે થઈ હતી. સમય જતાં આ પહેલ એક મોટા કમ્યુનિટી ડેવલપમેન્ટ પ્રોગ્રામમાં પરિવર્તિત થઈ ગઈ.
વર્ષ 2015માં સુઝેન ટરકોટ દ્વારા ‘માઉન્ટેન વ્યૂ સ્કૂલ’ની શરૂઆત કરવામાં આવી હતી. આ સ્કૂલની શરૂઆત 3થી 5 વર્ષની ઉંમરના 30થી ઓછા બાળકો માટે નાની નર્સરી તરીકે થઈ હતી. આજે આ સ્કૂલ સંપૂર્ણ રીતે માન્યતા પ્રાપ્ત પ્રાથમિક શાળામાં પરિવર્તિત થઈ છે, જ્યાં 300થી વધુ વિદ્યાર્થીઓ અભ્યાસ કરે છે. પોતાની માતાના શિક્ષણ અને સમાજસેવા પ્રત્યેના સમર્પણ વિશે વાત કરતાં કેટરીના કૈફે અગાઉ ABP ન્યૂઝ સાથેના એક ઈન્ટરવ્યૂમાં જણાવ્યું હતું કે તેમની માતા મદુરાઈમાં રહે છે અને તેમણે બાળકો માટે એક સ્કૂલ શરૂ કરી છે. તેઓ શિક્ષક છે અને ત્યાં બાળકોને ભણાવે છે. કેટરીનાએ કહ્યું હતું કે તેમની માતાના સારા કાર્યો અને આશીર્વાદને કારણે જ તેઓ આજે આ મુકામ સુધી પહોંચી શક્યાં છે.
પોતાની માતાની જીવનશૈલી વિશે વાત કરતાં કેટરીનાએ જણાવ્યું હતું કે ત્યાંની મૂળભૂત સુવિધાઓની અછત તેમના રોજિંદા જીવન અને વાતચીતને પણ અસર કરે છે. કેટરીનાના જણાવ્યા અનુસાર, તેમની માતા જ્યાં રહે છે ત્યાં વીજળીની સુવિધા મર્યાદિત છે અને દિવસમાં માત્ર આશરે 12 કલાક જ વીજળી આવે છે. કેટલીકવાર તેઓ પોતાની માતા સાથે ફેસટાઇમ પર વાત કરવા માંગે છે, પરંતુ વીજળી અથવા ઈન્ટરનેટ ન હોવાથી વાત કરી શકાતી નથી. આવી સ્થિતિમાં તેઓ સામાન્ય ફોન કોલ દ્વારા વાત કરે છે.
‘કલર્સ સિનેપ્લેક્સ’ના એક કાર્યક્રમમાં કેટરીનાએ પોતાની માતાના મજબૂત મનોબળ અને નિઃસ્વાર્થ ભાવના વિશે પણ વાત કરી હતી. તેમણે જણાવ્યું હતું કે તેમની માતા એવા ગામમાં રહે છે જ્યાં દિવસના ઘણા કલાકો સુધી વીજળી હોતી નથી. ત્યાં ખૂબ ગરમી હોય છે અને વીજળી ન હોવાથી AC જેવી સુવિધા પણ ઉપલબ્ધ નથી. કેટરીનાએ કહ્યું હતું કે તેમની માતા આવા સંજોગોમાં રહે છે અને વર્ષોથી આ જ રીતે લોકોની મદદ કરી રહી છે. તેમના મતે, આ સરળ જીવન નથી અને આવી જિંદગી જીવવા માટે અલગ પ્રકારના હિંમતવાન અને સેવાભાવી વ્યક્તિની જરૂર હોય છે. તેમણે એમ પણ કહ્યું હતું કે પોતે આવા સંજોગોમાં રહી શકશે કે નહીં તે અંગે તેમને ખાતરી નથી.
