ભોજપુરી એક્ટ્રેસ કાજલ રાઘવાની એક જ્વેલરી શોરૂમના ઉદ્ઘાટન કાર્યક્રમમાં સામેલ થવા માટે બિહાર શરીફ પહોંચી હતી. જોકે, કાજલને જોવા માટે મોટી સંખ્યામાં લોકો ઉમટી પડતાં સ્થિતિ બેકાબૂ બની ગઈ હતી. પરિસ્થિતિ એટલી ખરાબ થઈ ગઈ કે ભીડે કાજલની કારને પણ નિશાન બનાવી હતી. હાલમાં એક્ટ્રેસને સુરક્ષિત રીતે ત્યાંથી બહાર લઈ જવાના વીડિયો સોશિયલ મીડિયા પર વાયરલ થઈ રહ્યા છે. વાયરલ વીડિયોમાં જોવા મળે છે કે કાજલને સુરક્ષિત રીતે બહાર લઈ જવા માટે સિક્યુરિટી ટીમ પ્રયાસ કરી રહી છે, ત્યારે મોટી સંખ્યામાં લોકો તેમની કારની પાછળ દોડી રહ્યા છે. ભીડ સતત વધતી જતાં સમગ્ર વિસ્તારમાં અફરાતફરીનો માહોલ સર્જાયો હતો.
કાજલના બહાર નીકળવાનો વીડિયો વાયરલ થયા બાદ તેમના ચાહકોએ ચિંતા વ્યક્ત કરી હતી. ત્યારબાદ કાજલે પોતાના ઈન્સ્ટાગ્રામ પર એક વીડિયો શેર કરીને જણાવ્યું કે તે સંપૂર્ણપણે સુરક્ષિત રીતે ત્યાંથી બહાર નીકળી ગઈ છે અને હવે સલામત છે. કાજલે પોતાના ચાહકોના પ્રેમ અને ચિંતા બદલ તેમનો આભાર માન્યો હતો. સાથે જ ભવિષ્યમાં પણ આ જ રીતે તેમનો પ્રેમ અને સપોર્ટ મળતો રહે તેવી આશા વ્યક્ત કરી હતી.
રિપોર્ટ્સ અનુસાર, કાજલની મુલાકાત દરમિયાન સ્થિતિ ઘણી અફરાતફરીભરી બની ગઈ હતી. કાજલની એક ઝલક મેળવવા માટે ભીડે તેમની કારને ઘેરી લીધી હતી. આ દરમિયાન કારના કાચને નુકસાન પહોંચાડવામાં આવ્યું હતું અને એક બારી પણ તૂટી ગઈ હોવાનું સામે આવ્યું છે. જેમ જેમ ભીડ વધતી ગઈ તેમ શોરૂમના માલિકે કાજલને ત્યાંથી સુરક્ષિત રીતે બહાર કાઢવામાં મદદ કરી હતી. કાજલને ડ્રાઇવર તરફના ગેટમાંથી બહાર કાઢવામાં આવી હતી. ત્યારબાદ તેમની કાર ઝડપથી ત્યાંથી નીકળી ગઈ હતી.
ઈન્ડિયા ટુડેના અહેવાલ મુજબ, પોલીસે જણાવ્યું હતું કે કાર્યક્રમના આયોજકોએ જરૂરી વહીવટી મંજૂરી લીધી નહોતી અને તેમને નોટિસ મોકલવામાં આવશે. જોકે, શોરૂમના માલિકે પોલીસના આ દાવાને ખોટો ગણાવ્યો હતો. શોરૂમના માલિકે જણાવ્યું હતું કે જિલ્લા વહીવટીતંત્રને પત્ર દ્વારા કાર્યક્રમ અંગે જાણ કરવામાં આવી હતી અને મંજૂરી માટે 17 સપ્ટેમ્બરના રોજ જ અરજી કરવામાં આવી હતી.
કાજલ રાઘવાની ભોજપુરી ફિલ્મ ઈન્ડસ્ટ્રીની જાણીતી અભિનેત્રી છે. તેમણે ખૂબ જ નાની ઉંમરે અભિનયની શરૂઆત કરી હતી. કાજલે પોતાની કારકિર્દીની શરૂઆત ગુજરાતી ફિલ્મથી કરી હતી. ત્યારબાદ વર્ષ 2013માં ભોજપુરી ફિલ્મ ‘રિહાઈ’થી ભોજપુરી સિનેમામાં ડેબ્યૂ કર્યું હતું. ત્યારથી કાજલે પાછળ વળીને જોયું નથી. તેમણે અત્યાર સુધીમાં 50થી વધુ ભોજપુરી ફિલ્મોમાં કામ કર્યું છે. તેમની જાણીતી ફિલ્મોમાં ‘પટના સે પાકિસ્તાન’, ‘મેહંદી લગા કે રખના’, ‘ભોજપુરિયા રાજા’ અને ‘સંઘર્ષ’નો સમાવેશ થાય છે.
રિયાલિટી શોની વાત કરીએ તો કાજલ ‘ભોજપુરી બવાલ’માં પણ ભાગ લઈ ચૂકી છે. હવે તે ‘રાઇઝ એન્ડ ફોલ 2’માં જોવા મળશે. આ શો 26 સપ્ટેમ્બર, 2026ના રોજ પ્રીમિયર થવાનો છે. દર્શકો તેને બપોરે 12 વાગ્યાથી પ્રાઇમ વીડિયો અને MX પ્લેયર એન્ડ્રોઇડ એપ પર જોઈ શકશે.
