ગુરુગ્રામ: ગુરુગ્રામમાં એક શોપિંગ મોલની બહાર શુક્રવારે રાત્રે પતિ-પત્ની વચ્ચે હાઈવોલ્ટેજ ડ્રામા જોવા મળ્યો હતો. આ ઘટનાનો વીડિયો સોશિયલ મીડિયા પર વાયરલ થઈ રહ્યો છે, જે ગુરુગ્રામનો હોવાનું કહેવાઈ રહ્યું છે. વીડિયોમાં બંને વચ્ચે ઉગ્ર બોલાચાલી થતી જોવા મળે છે. ગુરુગ્રામ પોલીસે પણ વાયરલ વીડિયોને ધ્યાનમાં લઈને તેની તપાસ શરૂ કરી છે. વાયરલ વીડિયોની સાથે એવો દાવો કરવામાં આવી રહ્યો છે કે મહિલાએ પોતાના પતિને ટીબીની બીમારી હોવાનું કહીને સારવાર માટે ગામ જવાનું જણાવ્યું હતું. જોકે, મહિલા ઘણા દિવસો સુધી પરત ન ફરતાં પતિને તેની ચિંતા થવા લાગી હતી.
દરમિયાન પતિના એક પરિચિતે મહિલાને શહેરના એક શોપિંગ મોલમાં જોઈ હતી અને આ અંગે પતિને જાણ કરી હતી. દાવા અનુસાર, પતિ જ્યારે મોલ પહોંચ્યો ત્યારે તેની પત્ની ત્યાં આવેલા એક સ્પા સેન્ટરમાં કામ કરતી હોવાનું જાણવા મળ્યું હતું. આ બાબતને લઈને મોલની બહાર જ બંને વચ્ચે રસ્તા પર ઉગ્ર વિવાદ શરૂ થઈ ગયો હતો.
View this post on Instagram
વાયરલ વીડિયોમાં મહિલા વારંવાર પોતાના પતિને તેનો હાથ છોડવા માટે કહેતી જોવા મળે છે. ઘટનાસ્થળે લોકોની ભીડ પણ એકઠી થઈ ગઈ હતી. જોકે, વાયરલ થઈ રહેલા આ વીડિયોની હજુ સુધી સત્તાવાર પુષ્ટિ થઈ નથી કે આ ઘટના ખરેખર કયા સ્થળે અને કઈ તારીખે બની હતી.
સોશિયલ મીડિયા પર વાયરલ થયેલા આ વીડિયોનું ગુરુગ્રામ પોલીસે સંજ્ઞાન લીધું છે. પોલીસ પ્રવક્તાએ જણાવ્યું હતું કે વીડિયોની સત્યતા તેમજ આ સમગ્ર મામલો કયા પોલીસ સ્ટેશન વિસ્તાર સાથે સંબંધિત છે તેની તપાસ કરવામાં આવી રહી છે. હાલ પોલીસ તપાસ બાદ જ સ્પષ્ટ થશે કે વાયરલ વીડિયોમાં કરવામાં આવેલા દાવા કેટલા સાચા છે અને ઘટના ખરેખર ગુરુગ્રામની છે કે નહીં.
