“એ સમય ખૂબ જ ડરામણો હતો’ સુકેશ સાથે નામ જોડાતા નોરા ફતેહી ભાંગી પડી, જણાવી સમગ્ર હકીકત

અભિનેત્રી અને ડાન્સર નોરા ફતેહી (Nora Fatehi) હાલ ભારે ચર્ચામાં છે. નોરાએ તાજેતરમાં પોતાના જીવનના સૌથી મુશ્કેલ સમય વિશે ખુલીને વાત કરી છે. તેમણે જણાવ્યું કે જ્યારે તેમનું નામ 200 કરોડ રૂપિયાની કથિત છેતરપિંડી અને મની લોન્ડરિંગ કેસમાં જેલમાં બંધ સુકેશ ચંદ્રશેખર (Sukesh Chandrasekhar) સાથે જોડાયું હતું, ત્યારે તે ખરાબ રીતે ભાંગી પડી હતી. આ સમગ્ર મામલાની અસર તેમની કારકિર્દી પર પણ પડી હતી અને તેમને અનેક કામ તથા બ્રાન્ડ્સ ગુમાવવા પડ્યા હતા.

‘ડ્રીમ વિથ ડૉ. શીન’ પોડકાસ્ટમાં વાતચીત દરમિયાન નોરા ફતેહીએ કહ્યું કે તેઓ તે સમયને ક્યારેય ભૂલી શકશે નહીં. તેમણે જણાવ્યું કે આ મામલાએ તેને એટલી ડરાવી દીધી હતી કે આજે પણ કોઈ ઇવેન્ટમાં જતાં પહેલાં તેમના મનમાં ડર રહે છે કે આગળ શું થશે.

નોરાએ કહ્યું કે આ વિવાદના કારણે તેમના વિશે ઘણી ખોટી વાતો ફેલાવવામાં આવી હતી. તેમની માતા અને નજીકના મિત્રો તેમને સારી રીતે ઓળખતા હતા, તેથી તેમણે આ વાતો પર વિશ્વાસ કર્યો નહોતો. પરંતુ જો તેઓ નોરાને નજીકથી ઓળખતા ન હોત તો કદાચ તેમના વિશે ફેલાવવામાં આવેલી ખોટી વાતો પર વિશ્વાસ કરી લેત.

તેણે જણાવ્યું કે આ વિવાદના કારણે તેમને અનેક બ્રાન્ડ્સ અને કામ ગુમાવવું પડ્યું હતુ. આજે પણ કેટલાક લોકો કહે છે કે તે સુકેશને ઓળખતી હતી અથવા તેને ડેટ કરતા હતા, જ્યારે નોરાએ આ વાતોને સંપૂર્ણપણે ખોટી ગણાવી છે.

નોરાએ આગળ જણાવ્યું કે તેઓ એક ઇવેન્ટમાં ગઈ હતી, જ્યાં તેમની મુલાકાત સુકેશના પરિવાર અને તેની પત્ની સાથે થઈ હતી. તેને કાર અને કેટલીક ગિફ્ટ્સ પણ મળી હતી, પરંતુ તેને એવું કહેવામાં આવ્યું હતું કે આ સામાન્ય વાત છે. નોરાએ લોકોને સોશિયલ મીડિયાનો સમજદારીપૂર્વક ઉપયોગ કરવાની અપીલ કરી હતી. તેમણે કહ્યું કે કોઈ વ્યક્તિ વિશે ખોટી વાતો ફેલાવતા પહેલાં તેના કારણે થતી અસર વિશે વિચારવું જોઈએ.

નોરાએ એન્ફોર્સમેન્ટ ડિરેક્ટોરેટ (ED)ની પૂછપરછ અંગે પણ વાત કરી હતી. તે સમયને યાદ કરતાં તેમણે તેને અત્યંત ડરામણો ગણાવ્યો હતો. તેણે કહ્યું કે લગભગ બે વર્ષ સુધી ચાલેલી આ મુશ્કેલ પરિસ્થિતિ દરમિયાન તેઓ પોતાને ખૂબ એકલી અનુભવતી હતી અને તેને વધારે મદદ પણ મળી નહોતી. નોરાએ કહ્યું કે આ બે વર્ષમાં તેમણે ઘણું બધું સહન કર્યું.

તેને સૌથી વધુ દુઃખ એ વાતનું હતું કે તેમના વિશે એવી કહાની બનાવવામાં આવી કે તેઓ સુકેશને ઓળખતી હતી, તેને ડેટ કરતી હતી અને તેની પાસેથી પૈસા લીધા હતા. નોરાએ સ્પષ્ટ કર્યું કે આ વાતો ખોટી હતી. નોરાના જણાવ્યા અનુસાર, આ સમય તેમના માટે ખૂબ જ મુશ્કેલ, મૂંઝવણભર્યો અને પીડાદાયક હતો.