જયપુર: ‘ગુલાબી નગરી’ તરીકે ઓળખાતા જયપુરમાં મિસ યુનિવર્સ ઇન્ડિયા 2026ની ભવ્ય ગ્રાન્ડ ફિનાલે યોજાઈ હતી. આ ગ્રાન્ડ ફિનાલેમાં કેરળની 19 વર્ષીય કૈઝિયા લિઝ માયઝોએ મિસ યુનિવર્સ ઇન્ડિયા 2026નો ખિતાબ પોતાના નામે કર્યો છે. રાષ્ટ્રીય કક્ષાની આ સ્પર્ધાના ગ્રાન્ડ ફિનાલેમાં દેશના વિવિધ રાજ્યોમાંથી આવેલી 52 સ્પર્ધકોએ ભાગ લીધો હતો. કૈઝિયાએ પોતાના બેબાક અંદાજ અને બુદ્ધિમત્તાથી તમામ જજને પ્રભાવિત કરીને આ તાજ જીત્યો હતો. તમિલનાડુની વૈષ્ણવી ગણેશ ફર્સ્ટ રનર અપ રહી હતી.
મોડી રાત્રે વિજેતાના નામની જાહેરાત
મિસ યુનિવર્સ ઇન્ડિયા 2026ની વિજેતાના નામની જાહેરાત મોડી રાત્રે કરવામાં આવી હતી. ફાઇનલ મુકાબલામાં કેરળ અને તમિલનાડુની સ્પર્ધકો ટોચના બે સ્થાન સુધી પહોંચી હતી, પરંતુ અંતે કેરળની કૈઝિયાએ બાજી મારીને મિસ યુનિવર્સ ઇન્ડિયાનો તાજ પોતાના નામે કર્યો હતો. મિસ યુનિવર્સ ઇન્ડિયા 2025ની વિજેતા મણિકા વિશ્વકર્માએ કેરળની કૈઝિયા લિઝ માયઝોને તાજ પહેરાવ્યો હતો.
આ સુંદરીઓએ ટોપ-5માં સ્થાન બનાવ્યું
મિસ યુનિવર્સ ઇન્ડિયા 2026ની સ્પર્ધાના અંતિમ તબક્કામાં પાંચ ફાઇનલિસ્ટે સ્થાન મેળવ્યું હતું. તેમાં કેરળની કૈઝિયા લિઝ માયઝો, તમિલનાડુની વૈષ્ણવી ગણેશ, મહારાષ્ટ્રની તેજસ્વિની શ્રીવાસ્તવ, ગુજરાતની અનુશ્રી સતવાલેકર અને ઉત્તરાખંડની અનુભા વશિષ્ઠનો સમાવેશ થાય છે.
અંતિમ રાઉન્ડમાં પાંચેય ફાઇનલિસ્ટ સામે 40 સેકન્ડમાં ક્લોઝિંગ રિમાર્ક રજૂ કરવાનો પડકાર રાખવામાં આવ્યો હતો. તમામ સ્પર્ધકોએ પોતાના ભવિષ્યના દૃષ્ટિકોણ, જીવનના પડકારો અને મિસ યુનિવર્સ ઇન્ડિયા સુધી પહોંચવાની પોતાની સફરને પોતાના જવાબોમાં અસરકારક રીતે રજૂ કરી હતી.
મિસ યુનિવર્સ ઇન્ડિયા 2026ના પરિણામ
વિજેતા: કૈઝિયા લિઝ માયઝો – કેરળ
ફર્સ્ટ રનર અપ: વૈષ્ણવી ગણેશ – તમિલનાડુ
સેકન્ડ રનર અપ: અનુશ્રી સતવાલેકર – ગુજરાત
થર્ડ રનર અપ: તેજસ્વિની શ્રીવાસ્તવ – મહારાષ્ટ્ર
ફોર્થ રનર અપ: અનુભા વશિષ્ઠ – ઉત્તરાખંડ
