અમદાવાદ: ગુજરાતમાં ચોમાસું સક્રિય રહેતાં સરદાર સરોવર નર્મદા ડેમમાં પાણીની આવક સતત વધી રહી છે. 4 ઓગસ્ટની સ્થિતિ મુજબ ડેમ તેની કુલ સંગ્રહ ક્ષમતાના 78.35 ટકા સુધી ભરાઈ ગયો છે. 9,460 એમસીએમ (MCM)ની કુલ ક્ષમતા સામે હાલમાં 7,412 એમસીએમ પાણીનો સંગ્રહ થયો છે. ડેમની વર્તમાન જળસપાટી 132.10 મીટર નોંધાઈ છે, જ્યારે તેની મહત્તમ સપાટી 138.68 મીટર છે. હાલ ડેમમાં 46,375 ક્યુસેક પાણીની આવક થઈ રહી છે, જ્યારે 1,984 ક્યુસેક પાણી છોડવામાં આવી રહ્યું છે.
તાજેતરના વરસાદને કારણે નર્મદા ડેમની જળસપાટીમાં છેલ્લા 24 કલાક દરમિયાન અંદાજે 1 મીટરનો વધારો નોંધાયો છે. ડેમ હવે 78 ટકાથી વધુ ભરાઈ ચૂક્યો છે અને તેની પૂર્ણ ક્ષમતા સુધી પહોંચવા માટે હવે માત્ર થોડા મીટરનો જ વધારો બાકી છે.
રાજ્યના જળસંપત્તિ વિભાગના આંકડા મુજબ, સરદાર સરોવર નર્મદા ડેમ સહિત રાજ્યના 207 મુખ્ય ડેમોમાં સરેરાશ 68.52 ટકા પાણીનો સંગ્રહ થયો છે. જ્યારે સરદાર સરોવર ડેમને બાદ કરીએ તો બાકીના 206 ડેમોમાં સરેરાશ 62.63 ટકા પાણી ઉપલબ્ધ છે.
હાલ રાજ્યના 27 ડેમ સંપૂર્ણ ભરાઈ ગયા છે.
34 ડેમ હાઈ એલર્ટ પર છે, જેમાં 90 ટકાથી વધુ પાણી છે.
10 ડેમ એલર્ટ પર છે, જેમાં 80થી 90 ટકા પાણીનો સંગ્રહ છે.
9 ડેમ વોર્નિંગ પર છે, જેમાં 70થી 80 ટકા પાણી છે.
જ્યારે 153 ડેમોમાં હજુ 70 ટકાથી ઓછો પાણીનો સંગ્રહ નોંધાયો છે.
ઝોન પ્રમાણે પાણીની સ્થિતિ
રાજ્યના વિવિધ વિસ્તારોમાં ડેમોમાં પાણીની સ્થિતિ પણ અલગ-અલગ જોવા મળી રહી છે.
ઉત્તર ગુજરાત:15 ડેમમાં 41.96 ટકા પાણી, એક પણ ડેમ સંપૂર્ણ ભરાયો નથી.
મધ્ય ગુજરાત: 17 ડેમમાં 55.82 ટકા પાણી, 1 ડેમ સંપૂર્ણ ભરાયો.
દક્ષિણ ગુજરાત: 13 ડેમમાં 73.45 ટકા પાણી, 9 ડેમ ઓવરફ્લો.
કચ્છ: 20 ડેમમાં 25.49 ટકા પાણી, માત્ર 1 ડેમ સંપૂર્ણ ભરાયો.
સૌરાષ્ટ્ર: 141 ડેમમાં 52.94 ટકા પાણી, 16 ડેમ સંપૂર્ણ ભરાયા.
રાજ્યમાં અત્યાર સુધી 69.74 ટકા સરેરાશ વરસાદ
ચાલુ ચોમાસા દરમિયાન ગુજરાતમાં અત્યાર સુધી 69.74 ટકા સરેરાશ વરસાદ નોંધાયો છે.
ઝોનવાર વરસાદની સ્થિતિ આ મુજબ છે:
દક્ષિણ ગુજરાત: 95.74 ટકા (સૌથી વધુ)
પૂર્વ-મધ્ય ગુજરાત: 65.75 ટકા
સૌરાષ્ટ્ર: 54.47 ટકા
ઉત્તર ગુજરાત: 51 ટકા
કચ્છ: 29.05 ટકા (સૌથી ઓછો)
જિલ્લાવાર આંકડા મુજબ વલસાડમાં સૌથી વધુ 99 ઇંચ વરસાદ નોંધાયો છે, જ્યારે દેવભૂમિ દ્વારકામાં માત્ર 2 ઇંચ વરસાદ નોંધાતા તે રાજ્યમાં સૌથી ઓછો રહ્યો છે.
હજુ પણ અનેક તાલુકાઓમાં વરસાદની રાહ
રાજ્યના 38 તાલુકાઓમાં 100 ટકાથી વધુ વરસાદ નોંધાઈ ચૂક્યો છે, જ્યારે 84 તાલુકાઓમાં હજુ 50 ટકા જેટલો પણ વરસાદ થયો નથી. ભારે વરસાદને કારણે કેટલાક વિસ્તારોમાં પૂર જેવી સ્થિતિ સર્જાઈ હતી, જોકે વરસાદની તીવ્રતા ઘટતાં અસરગ્રસ્ત વિસ્તારોમાં હવે રાહત મળવાની આશા છે. બીજી તરફ કચ્છ, દેવભૂમિ દ્વારકા અને પોરબંદર જેવા ઓછા વરસાદવાળા વિસ્તારોમાં ખેડૂતો હજુ સારા વરસાદની રાહ જોઈ રહ્યા છે.
