નવી દિલ્હી: ભારતમાં પેટ્રોલ અને ડીઝલના ભાવમાં રાહત મળી છે. ખાનગી ક્ષેત્રની અગ્રણી ફ્યુઅલ રિટેલર નાયરા એનર્જી (Nayara Energy)એ પેટ્રોલના ભાવમાં પ્રતિ લિટર ₹5 અને ડીઝલના ભાવમાં પ્રતિ લિટર ₹3નો ઘટાડો જાહેર કર્યો છે. નવી કિંમતો 1 જુલાઈ 2026થી અમલમાં આવી ગઈ છે.
છેલ્લા બે વર્ષથી વધુ સમય પછી પહેલીવાર કોઈ કંપનીએ રિટેલ સ્તરે પેટ્રોલ-ડીઝલના ભાવમાં ઘટાડો કર્યો છે. આ નિર્ણય પાછળનું મુખ્ય કારણ મધ્ય પૂર્વમાં ઘટેલો તણાવ અને આંતરરાષ્ટ્રીય બજારમાં કાચા તેલના ભાવમાં થયેલો ઘટાડો હોવાનું માનવામાં આવે છે.
રશિયાની રોસનેફ્ટના સમર્થન ધરાવતી નાયરા એનર્જી હાલમાં ભારતમાં 7,000થી વધુ પેટ્રોલ પંપનું સંચાલન કરે છે અને તે દેશની સૌથી મોટી ખાનગી ફ્યુઅલ રિટેલ કંપની બની છે. કંપનીએ પોતાના દેશવ્યાપી નેટવર્ક પર પેટ્રોલના ભાવમાં ₹5 અને ડીઝલના ભાવમાં ₹3 પ્રતિ લિટરનો ઘટાડો કરીને ગ્રાહકોને મોટી રાહત આપી છે.
ઉદ્યોગ સાથે જોડાયેલા સૂત્રોના જણાવ્યા મુજબ, નાયરાના તમામ 7,000થી વધુ ફ્યુઅલ સ્ટેશનો પર નવી કિંમતો અમલમાં મૂકાઈ ચૂકી છે. જોકે વિવિધ રાજ્યોમાં સ્થાનિક કર (VAT)ના આધારે પેટ્રોલ-ડીઝલના ભાવમાં થોડો ફેરફાર હોઈ શકે છે. એક તરફ નાયરા એનર્જીએ ભાવ ઘટાડીને ગ્રાહકોને રાહત આપી છે, તો બીજી તરફ સરકારી તેલ કંપનીઓએ હજુ સુધી પોતાની કિંમતોમાં કોઈ ફેરફાર કર્યો નથી.
ઇન્ડિયન ઓઇલ કોર્પોરેશન (IOC), ભારત પેટ્રોલિયમ (BPCL) અને હિંદુસ્તાન પેટ્રોલિયમ (HPCL) દેશના 90 ટકાથી વધુ પેટ્રોલ પંપનું સંચાલન કરે છે. તેમના પંપ પર હાલ પણ જૂના ભાવ જ અમલમાં છે. રાજધાની દિલ્હીમાં IOCના પંપ પર પેટ્રોલનો ભાવ ₹102.12 પ્રતિ લિટર અને ડીઝલનો ભાવ ₹95.20 પ્રતિ લિટર છે.
જેટલો વધારો કર્યો હતો, એટલો જ ઘટાડો કર્યો
ઉલ્લેખનીય છે કે અમેરિકા-ઈરાન યુદ્ધ અને વૈશ્વિક તણાવના કારણે આંતરરાષ્ટ્રીય બજારમાં કાચા તેલના ભાવમાં ભારે વધારો થયો હતો. તે સમયે નાયરા એનર્જી પણ પેટ્રોલ અને ડીઝલના ભાવ વધારનાર પ્રથમ કંપનીઓમાં સામેલ હતી. કંપનીએ 26 માર્ચ 2026ના રોજ પેટ્રોલના ભાવમાં ₹5 પ્રતિ લિટર અને ડીઝલના ભાવમાં ₹3 પ્રતિ લિટરનો વધારો કર્યો હતો. હવે કંપનીએ એટલો જ ઘટાડો કરીને ગ્રાહકોને રાહત આપી છે.
સરકારી કંપનીઓએ પણ વધાર્યા હતા ભાવ
નાયરા બાદ, લગભગ ચાર વર્ષ સુધી ભાવ સ્થિર રાખ્યા પછી સરકારી તેલ કંપનીઓએ પણ મે મહિનામાં પેટ્રોલ-ડીઝલના ભાવમાં અનેક વખત વધારો કર્યો હતો. IOC, BPCL અને HPCLએ મળીને પેટ્રોલ અને ડીઝલના ભાવમાં કુલ ₹7.50 પ્રતિ લિટર સુધીનો વધારો કર્યો હતો. કંપનીઓએ આ વધારાનું કારણ મધ્ય પૂર્વમાં યુદ્ધના કારણે ઊભા થયેલા તેલ સંકટ અને વધતા ખર્ચને ગણાવ્યું હતું. નિષ્ણાતોના મતે, જો આંતરરાષ્ટ્રીય બજારમાં કાચા તેલના ભાવ નીચા જ રહેશે, તો આગામી સમયમાં અન્ય કંપનીઓ પણ ભાવ ઘટાડાની જાહેરાત કરી શકે છે.
