વંચિત વિદ્યાર્થીઓને નોટબુક, સ્કૂલ કીટ અને શૈક્ષણિક સામગ્રીનું વિતરણ કરી શિક્ષણને બનાવી વધુ સુલભ
અમદાવાદ: નવા શૈક્ષણિક વર્ષના પ્રારંભ સાથે જ વિદ્યાર્થીઓના ઉજ્જવળ ભવિષ્યને ધ્યાનમાં રાખીને ડ્રીમ ફાઉન્ડેશન દ્વારા દર વર્ષની જેમ આ વર્ષે પણ “પ્રોજેક્ટ શિક્ષા” અંતર્ગત વંચિત અને જરૂરિયાતમંદ વિદ્યાર્થીઓને શૈક્ષણિક સહાય પૂરી પાડવાની પહેલ હાથ ધરવામાં આવી હતી. ત્રણ તબક્કામાં આયોજિત આ અભિયાન દ્વારા સંસ્થાએ રાજ્યના વિવિધ વિસ્તારોમાં 1,100થી વધુ વિદ્યાર્થીઓ સુધી પહોંચી તેમને અભ્યાસ માટે જરૂરી શૈક્ષણિક સામગ્રીનું વિતરણ કર્યું.
પ્રોજેક્ટના પ્રથમ તબક્કામાં ડાકોર નજીક ઠાસરા તાલુકાના રતનજીના મુવાડા પ્રાથમિક શાળા ખાતે આશરે 450 વિદ્યાર્થીઓને નોટબુકનું વિતરણ કરવામાં આવ્યું હતું. વિદ્યાર્થીઓને શિક્ષણનું મહત્વ સમજાવી તેમને નિયમિત અભ્યાસ અને ઉજ્જવળ કારકિર્દી માટે પ્રેરિત કરવામાં આવ્યા હતા.
બીજા તબક્કામાં ખેડા જિલ્લાના કપડવંજ તાલુકાની ડોડિયાપુરા પ્રાથમિક શાળા અને કોટવાળના મુવાડા પ્રાથમિક શાળા ખાતે કુલ 250 વિદ્યાર્થીઓને નોટબુકનું વિતરણ કરવામાં આવ્યું હતું. આ કાર્યક્રમમાં ડ્રીમ ફાઉન્ડેશનના વોલન્ટિયર્સે ઉત્સાહભેર ભાગ લઈ વિદ્યાર્થીઓ સાથે સંવાદ સાધ્યો અને શિક્ષણ પ્રત્યે જાગૃતિ ફેલાવી.
ત્રીજા તબક્કામાં સાંણદ સ્થિત ભગીની સમાજ કન્યા છાત્રાલયમાં રહેતી 120 દીકરીઓને સ્કૂલ કીટનું વિતરણ કરવામાં આવ્યું હતું. ટીટેક (TTEC) ઈન્ડિયા ફાઉન્ડેશનના સહયોગથી દરેક વિદ્યાર્થીનીને સ્કૂલ બેગ, લંચ બોક્સ, વોટર બોટલ અને ફુલસ્કેપ નોટબુક સહિતની કીટ આપવામાં આવી હતી, જેનાથી તેમના અભ્યાસને વધુ સુવિધાજનક બનાવવા પ્રયત્ન કરવામાં આવ્યો. આ ઉપરાંત દાદાગ્રામ ખાતે આવેલી શાળાના આશરે 350 વિદ્યાર્થીઓને કલર બોક્સ અને સ્કેચ પેનનું વિતરણ કરીને સર્જનાત્મક શિક્ષણને પણ પ્રોત્સાહન આપવામાં આવ્યું હતું.
ડ્રીમ ફાઉન્ડેશનના પ્રતિનિધિઓએ જણાવ્યું હતું કે, “પ્રોજેક્ટ શિક્ષા”નો મુખ્ય હેતુ માત્ર શૈક્ષણિક સામગ્રીનું વિતરણ કરવાનો નથી, પરંતુ આર્થિક રીતે નબળા વર્ગના બાળકોમાં શિક્ષણ પ્રત્યે વિશ્વાસ, આત્મવિશ્વાસ અને ઉજ્જવળ ભવિષ્યના સપના પ્રત્યે નવી આશા જગાવવાનો છે. સંસ્થા આગામી સમયમાં પણ વધુ વિસ્તારોમાં આવી જ શિક્ષણલક્ષી અને સામાજિક પહેલો દ્વારા વિદ્યાર્થીઓ સુધી પહોંચવાનું ચાલુ રાખશે.
ડ્રીમ ફાઉન્ડેશન છેલ્લા ઘણા વર્ષોથી શિક્ષણ, મહિલા સશક્તિકરણ, આરોગ્ય અને સામાજિક વિકાસ જેવા વિવિધ ક્ષેત્રોમાં સતત કાર્યરત છે અને સમાજના જરૂરિયાતમંદ વર્ગ સુધી સકારાત્મક પરિવર્તન પહોંચાડવા પ્રતિબદ્ધ છે.
