IPL 2026ના કારણે યુવા ખેલાડી વૈભવ સૂર્યવંશીનું નામ હાલ ક્રિકેટ જગતમાં ખૂબ ચર્ચામાં છે. તેની આક્રમક બેટિંગથી તે ચાહકોનું દિલ જીતી રહ્યો છે. 10 એપ્રિલે RCB સામે રમાયેલી મેચમાં રાજસ્થાન રોયલ્સ તરફથી રમતા વૈભવે માત્ર 26 બોલમાં 8 ચોગ્ગા અને 7 છગ્ગા સાથે 78 રનની ધમાકેદાર ઇનિંગ રમી હતી.
વૈભવને IPL 2025ના મેગા ઓક્શનમાં રાજસ્થાન રોયલ્સ દ્વારા ₹1.10 કરોડમાં ખરીદવામાં આવ્યો હતો. પોતાની ડેબ્યૂ સિઝનમાં તેણે 7 મેચોમાં શાનદાર પ્રદર્શન કરીને ટીમનો વિશ્વાસ જીત્યો, જેના કારણે તેને આગળની સીઝન માટે પણ રિટેન કરવામાં આવ્યો. હવે પ્રશ્ન એ છે કે IPL 2026 માટે તેની સેલરીમાં વધારો થયો છે કે નહીં? તો જવાબ છે – નહીં. વૈભવને આ સીઝનમાં પણ ₹1.10 કરોડ જ મળશે, જે તેની ફિક્સ કોન્ટ્રાક્ટ રકમ છે.
જો કે, BCCIના નિયમો મુજબ, દરેક મેચ માટે અલગથી ફી આપવામાં આવે છે. પ્લેઇંગ 11માં સામેલ દરેક ખેલાડી (ઇમ્પેક્ટ પ્લેયર સહિત)ને પ્રતિ મેચ ₹7.50 લાખ મળે છે. એટલે કે જો વૈભવ 14 લીગ મેચોમાં રમે, તો તે ફક્ત મેચ ફીમાંથી જ લગભગ ₹90 લાખ કમાઈ શકે છે.
આ રીતે જો કોન્ટ્રાક્ટ સેલરી અને મેચ ફી બંનેને જોડીએ, તો વૈભવ સૂર્યવંશી IPL 2026 સીઝનમાં કુલ મળી લગભગ ₹2 કરોડ સુધીની કમાણી કરી શકે છે. નોંધનીય છે કે આ મેચ ફીનો નિયમ BCCI દ્વારા 2025થી લાગુ કરવામાં આવ્યો છે.
વૈભવે અત્યાર સુધી તેની IPL કારકિર્દીમાં 11 મેચ રમી છે. આ દરમિયાન તેણે 11 ઇનિંગ્સમાં 41.09ની સરેરાશ અને 229.44ના સ્ટ્રાઈક રેટ સાથે કુલ 452 રન બનાવ્યા છે. જેમાં એક સદી અને ત્રણ અડધી સદીનો સમાવેશ થાય છે. આ રીતે વૈભવ સૂર્યવંશી માત્ર પોતાની બેટિંગથી જ નહીં, પરંતુ પોતાની કમાણી અને પ્રદર્શન બંનેથી ચર્ચામાં રહ્યો છે.