ડાયનાસોરોના વિલુપ્ત થયા બાદ આશરે 66 મિલિયન વર્ષ પછી હવે તેમના નિશાન લક્ઝરી ફેશનની દુનિયામાં ફરી જોવા મળ્યા છે. વૈજ્ઞાનિકો અને ડિઝાઇનરોએ મળીને દુનિયાનું પહેલું “ટી-રેક્સ લેધર” હેન્ડબેગ બનાવ્યું છે, જે સંપૂર્ણપણે લેબમાં ઉગાડેલા કોલેજનથી બનાવવામાં આવ્યું છે.
આ બેગ ટાયરાનોસોરસ રેક્સ (T. rex) ના જીવાશ્મોથી પ્રેરિત છે અને તેમાં કોઈપણ પ્રાણીને નુકસાન પહોંચાડ્યા વગર બનાવવામાં આવ્યો છે. આ માટે અમેરિકા ખાતે મળેલા ટી-રેક્સના જીવાશ્મોમાંથી મળેલા પ્રાચીન કોલેજન પ્રોટીનના ટુકડાઓનો ઉપયોગ કરવામાં આવ્યો.
વૈજ્ઞાનિકોએ AI અને કમ્પ્યુટેશનલ બાયોલોજીની મદદથી બાકી રહેલી જનેટિક માહિતી ફરીથી તૈયાર કરી અને પછી તેને સેલ લાઇનમાં દાખલ કરીને લેબમાં કોલેજન ઉગાડ્યું. આ સમગ્ર પ્રક્રિયામાં કોઈ પણ પ્રાણીનું બલિદાન લેવાયું નથી. આ અનોખો પ્રોજેક્ટ ક્રિએટિવ એજન્સી VML, ઓર્ગેનોઇડ કંપની અને લેબ-ગ્રોન લેધર લિમિટેડના સહયોગથી તૈયાર થયો છે.
બેગની ડિઝાઇન ટેકવેર બ્રાન્ડ Enfin Levé દ્વારા કરવામાં આવી છે. તેને “ટી-રેક્સ લેધર” નામ આપવામાં આવ્યું છે, જે સસ્ટેનેબલ ફેશન માટે એક નવી દિશા બતાવે છે. બેગનો રંગ ટીલ (વાદળી-લીલો) છે અને હાલમાં એમ્સ્ટરડમના આર્ટ ઝૂ મ્યુઝિયમમાં પ્રદર્શિત કરવામાં આવ્યું છે.
આ બેગને એક પથ્થર પર, પિંજરામાં રાખવામાં આવ્યું છે – બરાબર એક લાઇફ-સાઇઝ ટી-રેક્સની નકલ નીચે. આ નકલ નેધરલેન્ડ્સના નેચુરાલિસ બાયોડાયવર્સિટી સેન્ટરમાંથી લેવામાં આવી છે. આ સેટઅપનો હેતુ જીવાશ્મ અને આધુનિક લક્ઝરી વચ્ચેનો સંબંધ દર્શાવવાનો છે.
આ પ્રદર્શન 2 એપ્રિલ 2026થી શરૂ થયું છે અને 11 મે 2026 સુધી ચાલશે. ત્યારબાદ આ અનોખા બેગની હરાજી કરવામાં આવશે. તેની શરૂઆતની કિંમત 5 લાખ ડોલરથી વધુ (લગભગ 5 કરોડ રૂપિયા) ગણાવવામાં આવી રહી છે, જે તેને દુનિયાના સૌથી મોંઘા અને અનોખા ફેશન આઇટમ્સમાં સ્થાન અપાવશે.
આ બેગ માત્ર એક એક્સેસરી નથી, પરંતુ બાયોટેક્નોલોજી અને ફેશનના સંયોજનનું પ્રતિક છે. તે બતાવે છે કે ભવિષ્યમાં પ્રાણીઓને નુકસાન પહોંચાડ્યા વગર પણ લેધર તૈયાર કરી શકાય છે.
વિશેષજ્ઞો માને છે કે આ સસ્ટેનેબલ લેધરની નવી પેઢીની શરૂઆત છે. જોકે કેટલાક વૈજ્ઞાનિકો “ટી-રેક્સ લેધર” નામ અંગે શંકા વ્યક્ત કરે છે, પરંતુ આ પ્રોજેક્ટનો મુખ્ય હેતુ ક્રૂરતા-મુક્ત વિકલ્પ આપવાનો છે. આ પ્રયોગ દર્શાવે છે કે પ્રાચીન જીવવિજ્ઞાન કેવી રીતે આધુનિક લક્ઝરીને નવી દિશા આપી શકે છે.