ભારત અને ઇંગ્લેન્ડ વચ્ચે રમાયેલી ટી20 વર્લ્ડ કપ 2026ની સેમિફાઈનલ મેચને જોવા માટે ભારતનો પૂર્વ કેપ્ટન રોહિત શર્મા પણ વાનખેડે સ્ટેડિયમમાં પહોંચ્યો હતો. મેચ પહેલા તેઓએ ભારતીય ખેલાડીઓ સાથે મળીને ટીમનો ઉત્સાહ વધાર્યો અને આ દરમિયાન જ્યારે તે સ્પિનર કુલદીપ યાદવને મળ્યો તો એક રમૂજી દ્રશ્યો જોવા મળ્યું, જેનો વીડિયો હવે સોશિયલ મીડિયા પર વાયરલ થઈ રહ્યો છે.
મેચ પહેલા જ્યારે રોહિત અને કુલદીપ બાઉન્ડ્રી સાઇડલાઇન પાસે મળ્યા, ત્યારે રોહિત ડાબા હાથના સ્પિનર કુલદીપને ગળે લગાવીને મળવા માટે આગળ વધ્યા હતા. પરંતુ જેમ જ તેઓ નજીક ગયા તેમ તેમણે કુલદીપની ટી-શર્ટ પર કંઈક લાગેલું જોયું. આ જોઈને ‘હિટમેન’ તરત જ પાછળ હટી ગયા. ત્યારબાદ રોહિત કુલદીપની શર્ટ પર લાગેલા નિશાન તરફ ઈશારો કરીને હસવા લાગ્યા.
Rohit Sharma was about to hug Kuldeep Yadav, but he noticed something was on Kuldeep, so he didn’t hug him. Instead, he started joking and having fun with him. 😂❤️ pic.twitter.com/EOtHYyTazF
— 𝐑𝐮𝐬𝐡𝐢𝐢𝐢⁴⁵ (@rushiii_12) March 5, 2026
ગળે મળવાના બદલે રોહિતે કુલદીપ સાથે મજાક કરવાનું શરૂ કર્યું અને તેમની ટી-શર્ટ પર લાગેલા નિશાન અંગે તેમને ચીડવ્યા. કુલદીપને પણ જ્યારે સમજાયું કે રોહિત શું કહી રહ્યા છે ત્યારે તેઓ પણ હસવા લાગ્યા. આ મજેદાર ઘટના નો વીડિયો હાલ સોશિયલ મીડિયા પર ખૂબ વાયરલ થઈ રહ્યો છે.
મેચની વાત કરીએ તો 254 રનની લક્ષ્યાંકનો પીછો કરવા ઉતરેલી ઇંગ્લેન્ડ ટીમે પણ આક્રમક શરૂઆત કરી અને પાવરપ્લેમાં 68 રન બનાવી લીધા. જોકે ફિલ સોલ્ટ (5), કેપ્ટન હેરી બ્રૂક (7) અને જોશ બટલર (25) ઝડપથી આઉટ થઈ ગયા. ત્યારબાદ જેકબ બેથેલે શાનદાર બેટિંગ કરીને ઇંગ્લેન્ડની આશા જીવંત રાખી. બેથેલે પહેલા વિલ જેક્સ (35) અને પછી સેમ કરન (18) સાથે મહત્વપૂર્ણ ભાગીદારી કરી. તેણે 48 બોલમાં 8 ચોગ્ગા અને 7 છગ્ગાની મદદથી 105 રનની ઉત્તમ ઇનિંગ રમી. જો કે છેલ્લી ઓવરમાં ઇંગ્લેન્ડને જીત માટે 30 રનની જરૂર હતી, પરંતુ ટીમ 246 રન સુધી જ પહોંચી શકી. ભારત તરફથી બોલિંગમાં હાર્દિક પંડ્યાએ 2 વિકેટ લીધી, જ્યારે અક્ષર પટેલ, અર્શદીપ સિંહ, વરુણ ચક્રવર્તી અને જસપ્રીત બુમરાહે 1-1 વિકેટ મેળવી.
