અમદાવાદ: આંતરરાષ્ટ્રીય મહિલા દિવસના અવસર પર જનરલી સેન્ટ્રલ ઇન્શ્યુરન્સ એ Happy Women’s Pay નામથી નવું અભિયાન શરૂ કર્યું છે. આ અભિયાનનો મુખ્ય હેતુ મહિલાઓ અને પુરુષોને સમાન કામ માટે સમાન પગાર મળે તે અંગે જાગૃતિ ફેલાવવાનો છે.
જનરલી સેન્ટ્રલ ઇન્શ્યુરન્સ, જે વૈશ્વિક ઇન્સ્યોરન્સ કંપની જનરલી અને સેન્ટ્રલ બેન્ક ઓફ ઇન્ડિયાનું સંયુક્ત સાહસ છે, તેણે જણાવ્યું છે કે મહિલા દિવસની સાચી ઉજવણી ફક્ત શુભેચ્છાઓ અથવા પ્રતીકાત્મક કાર્યક્રમોથી નહીં, પરંતુ કાર્યસ્થળે સમાનતા અને ન્યાયથી થવી જોઈએ.
કંપનીએ જણાવ્યું છે કે વિશ્વભરમાં આજે પણ મહિલાઓને પુરુષો કરતાં ઓછો પગાર મળે છે. ભારતમાં અંદાજે 35 ટકા જેટલો જન્ડર પે ગેપ છે, એટલે કે મહિલાઓને સરેરાશ પુરુષોના પગારના લગભગ 65 ટકા જેટલો જ પગાર મળે છે.
આ અભિયાન અંગે કંપનીના મેનેજિંગ ડિરેક્ટર અને સીઈઓ અનુપ રાવે જણાવ્યું કે, સારો અને ટકાઉ વ્યવસાય ન્યાય અને વિશ્વાસ પર આધારિત હોય છે. સમાન કામ માટે સમાન પગાર આપવો કોઈ લક્ષ્ય નહીં પરંતુ સામાન્ય નિયમ હોવો જોઈએ. જ્યારે સંસ્થાઓ આ બાબતમાં યોગ્ય નિર્ણય લે છે ત્યારે તે કાર્યસ્થળમાં વિશ્વાસ અને મજબૂત ટીમ બનાવવામાં મદદ કરે છે.
‘Happy Women’s Pay’ અભિયાન દ્વારા કંપનીએ મહિલા દિવસને એક નવી રીતે રજૂ કરવાનો પ્રયાસ કર્યો છે. આ અભિયાનમાં એક સ્લેમ-પોએટ્રી ફિલ્મ પણ બનાવવામાં આવી છે, જેમાં 15 મહિલાઓના અવાજ દ્વારા સમાન પગારની માંગ અને કાર્યસ્થળે સન્માનની જરૂરિયાત રજૂ કરવામાં આવી છે.
આ અભિયાનમાં ફૂલો અને શુભેચ્છાઓ જેવી પરંપરાગત ઉજવણી કરતાં વધુ મહત્વ સમાન પગાર અને પારદર્શકતા પર આપવામાં આવ્યું છે. કંપનીએ જણાવ્યું છે કે સમાન પગાર માત્ર એક દિવસની જાહેરાત નહીં, પરંતુ આખા વર્ષ દરમિયાન અનુસરવાની પ્રતિબદ્ધતા હોવી જોઈએ.
‘Happy Women’s Pay’ અભિયાનને ડિજિટલ પ્લેટફોર્મ, સોશિયલ મીડિયા, પ્રિન્ટ અને આઉટડોર જાહેરાતો દ્વારા પ્રચારિત કરવામાં આવશે, જેથી વધુમાં વધુ લોકો સુધી આ સંદેશ પહોંચે અને સમાજમાં સમાનતા અંગે ચર્ચા વધે.
